Zhao Chuang: Qinzhou hanesan odamatan Xina nian ba kooperasaun ho ASEAN
XINA, 15 Setembru 2026 (TATOLI) – Vise-Prezidente Kámara Governu Populár Munisipál Qinzhou, Zhao Chuang, subliña katak pozisaun estratéjiku Qinzhou nian hanesan odamatan Xina nian hodi hametin konetividade, komérsiu, no kooperasaun ekonómika ho nasaun sira ASEAN nian.
Zhao Chuang hato’o deklarasaun ne’e iha jantar hamutuk ho delegasaun mídia husi nasaun sira ASEAN nian iha Otél Internasionál Qinzhou Tianjiao, Xina, tersa-feira kalan. Enkontru ne’e hala’o hafoin jornalista sira kompleta série vizita sira bá fatin estratéjiku oioin iha Qinzhou.
“Qinzhou iha sentru husi Zona Ekonómika Golfu Guangxi Beibu nian no serve hanesan portu ba rota prinsipál tolu husi Korredór Internasionál Foun Komérsiu Terrestre-Tasi nian. Ida-ne’e iha liña oin husi abertura no koperasaun Xina nian ho ASEAN”, Zhao Chuang hatete.
Tuir nia, Qinzhou nia pozisaun jeográfika sei sai estratéjiku liután ho prezensa husi Kanál Pinglu, ne’ebé dezeña atu kria rota transporte intermodal mota no tasi nian ne’ebé badak, ekonómiku liu, no prátiku liu entre sudeste Xina no ASEAN.
Nia subliña Kanál Pinglu hanesan projetu istóriku ida ne’ebé sei realiza mehi ida durante sékulu ida no loke liután Qinzhou nia potensiál nu’udar sentru komérsiu nian.
“Kanál Pinglu ida-ne’e sai osan-mean ida sei kria korredór transporte mota no tasi nian ne’ebé badak liu, ekonómiku liu no konveniente liu ne’ebé liga sudeste Xina nian ho ASEAN”, nia realsa.
Zhao esplika katak impaktu husi konstrusaun Kanál Pinglu nian iha ekonomia Qinzhou nian sai evidente ona. Dezde inísiu tinan ida-ne’e, empreza manufatura lima konfirma ona planu investimentu sira ho valór liu yuan billaun 10 iha Qinzhou durante períodu planu tinan lima ba da-15.
Iha semestre dahuluk tinan ida-ne’e nian, Qinzhou nia produtu internu brutu (PIB) aumenta ho pursentu 7,2 ne’ebé Zhao hatete katak tau sidade iha fatin dahuluk iha kreximentu ekonómiku iha Rejiaun Autónoma Guangxi Zhuang.
Aleinde hametin konetividade, Qinzhou dezenvolve hela agrupamentu industriál sira ne’ebé foka ba petrokímika verde sira, materiál enerjia foun sira, no fabrikasaun ekipamentu sira.
Sidade ne’e mós simu plataforma abertura oioin iha nivel nasionál, inklui Parke Industriál Qinzhou Xina-Malázia no área Portu Qinzhou iha zona komérsiu livre nia laran, ne’ebé serve hanesan plataforma importante sira ba kolaborasaun industriál no troka ekonómiku no komersiál entre Xina no ASEAN.
Molok tuir jantar, delegasaun mídia ASEAN nian vizita Baze Portu Qinzhou husi Lojístika Integradu Kadeia Malirin Korredór Foun Rai-Tasi Osidentál nian ka Qinzhou Port Base of Western Land-Sea New Corridor Integrated Cold Chain Logistics, fasilidade ida-ne’e apoia armazenamentu, prosesamentu, no distribuisaun produtu sira ne’ebé presiza kontrolu temperatura, hanesan ai-fuan, na’an, no hahán tasi nian.
Delegasaun ne’e mós vizita Qinzhou Blue Bay hodi observa dezenvolvimentu no prezervasaun ekosistema tasi-ibun nian, inklui mangrove sira, molok esplora patrimóniu kulturál lokál liuhusi vizita ida ba Muzeu Serámika Qinzhou Nixing, iha ne’ebé partisipante sira iha oportunidade atu iha esperiénsia halo no eskultura serámika tradisionál.
Iha nia diskursu, Zhao subliña papél husi jornalista sira ASEAN nian hodi promove dezenvolvimentu Qinzhou nian ba komunidade internasionál. Nia haktuir katak mídia la’ós de’it sai fonte informasaun, maibé bele mós sai hanesan ponte ba troka kulturál no kooperasaun entre nasaun sira.
“Ita-boot hanesan ponte importante ida ne’ebé liga Qinzhou ho mundu no ajuda mundu komprende Qinzhou”, nia hatete.
Nia hein katak jornalista sira bele haree rasik dezenvolvimentu Qinzhou nian durante vizita no bele fahe istória sira kona-ba sidade, inklui oportunidade sira ba kooperasaun no relasaun amizade ho ASEAN.
Jornalista husi mídia National Broadcasting Services of Thailand (NBT), Maneenat Onpanna, ne’ebé reprezenta delegasaun mídia ASEAN, hato’o apresiasaun ba Governu Xina tanba bele fó ona oportunidade ba jornalista sira husi ASEAN vizita Xina.
Nia hatete katak vizita ba Qinzhou fó oportunidade ba jornalista sira atu observa diretamente dezenvolvimentu sidade Qinzhou nian, inklui papél Portu Qinzhou nian ne’ebé iha rota komérsiu internasionál liga Xina ho Sudeste Aziátiku no merkadu globál.
Maneenat espera katak jornalista sira sei lori fali istória barak liután kona-ba Qinzhou hodi fahe ho povu sira husi nasaun sira ASEAN nian.
Jantar ne’e konklui loron dahuluk vizita delegasaun mídia ASEAN nian ba Qinzhou. Partisipante sira tuir planu sei kontinua ajenda vizita sira iha Quinzhou, molok filafali ba Nanning hodi partisipa iha Expo Xina-ASEAN (CAEXPO) no Simeira Negósiu no Investimentu Xina-ASEAN (CABIS).
Jornalista: Arminda Fonseca
Editora: Maria Auxiliadora
