Austrália reafirma kompromisu apoiu Timor-Leste nia adezaun nu’udár membru plenu ASEAN
DILI, 16 Setembru 2026 (TATOLI)—Embaixadora Austrália ba ASEAN, Tiffany McDonald, hala’o sorumutu ho Prezidente Repúblika, José Ramos-Horta, hodi reafirma nia kompromisu atu apoiu Timor-Leste nia adezaun nu’udár membru plenu Association of Southeast Asian Nations (ASEAN).
“Objetivu husi ha’u-mia vizita mai Dili, naturalmente, atu halo enkontru ho Prezidente Repúblika atu reafirma ami-nia kompromisu hodi apoia Timor-Leste nia adezaun nu’udár membru plenu iha ASEAN, no mós atu ko’alia kona-ba área oioin husi kooperasaun ne’ebé mak ami bele dezenvolve hamutuk. Liuliu, atu asegura katak Timor-Leste nia adezaun hanesan membru foun iha ASEAN bele fó rezultadu pozitivu ba povu Timor-Leste, ba ASEAN, naturalmente ba Austrália no ita-nia rejiaun komún,” nia dehan ba jornalista sira, iha Palásiu Prezidensiál, Bairru Pite, Dili, Kuarta ne’e.
Nia subliña liuhusi kooperasaun Austrália ho ASEAN ne’e bele servisu hamutuk besik liután ba prioridade sira-ne’ebé ASEAN identifika ona. Kooperasaun ne’e bele inklui tranzisaun enerjétika, bele mós kona-ba integrasaun ekonómika, transformasaun dijitál, no mós avansa ASEAN ne’ebé tau rekursu umanu nu’udár sentru ba dezenvolvimentu.
“Ha’u kontente tebes tanba bele mai iha-ne’e atu ko’alia ho kle’an liután kona-ba oinsá ita bele kontinua dezenvolve kooperasaun ne’e ho Timor-Leste, nu’udár membru foun iha ASEAN,” nia espresa.
Nune’e mós, Embaixadora Austrália ba Timor-Leste, Caitlin Wilson hateten, nu’udár Embaixadora Austrália ba Timor-Leste, hakarak valoriza tebes Embaixadora sira-ne’ebé halo vizita ba nasaun sira, inklui embaixadora Tiffany ne’ebé mai vizita Timor-Leste hodi avansa polítika no kooperasaun iha área espesífiku sira.
“Ami sei kontinua servisu besik liután iha nível bilaterál ho Prezidente no Governu, atu oinsá ami bele servisu hamutuk no besik liután hodi apoia polítika no ambisaun sira kona-ba atu organiza eventu ka atividade ruma,” nia konklui.
Jornalista: Osória Marques
Editór: Xisto Freitas da Piedade
