Estrada foun ne’ebé Autoridade Irabin de Baixo loke liga bá sítiu rezisténsia konkluidu
VIKEKE, 16 Setembru 2026 (TATOLI)—Xefe Suku Irabin de Baixo, Postu Administrativu Uatukarbau, Munisípiu Vikeke, José Baptista do Carmo, relata progresu loke estrada foun kilómetru rua-resin liga ba sítiu rezisténsia Betulale konklui ona.
“Estrada kilómetru 2,700, luan metru lima (5), ke’e hotu ona. Komunidade komesa asesu ona estrada foun ne’e,” José Baptista ba TATOLI, iha Postu Uatukarbau, Kuarta ne’e.
Notísia relevante: https://tatoli.tl/2026/08/22/autoridade-irabin-de-baixo-deside-loke-estrada-foun-ba-sitiu-rezistensia/
Autoridade komunitária ne’e hatutan estrada ne’e parte tékniku Programa Nasionál Dezenvolvimentu Suku (PNDS) Munisípiu Vikeke bá survey ona no rezultadu survey hatudu katak konsege ke’e ona kilómetru 2,700. Husi rezultadu atinjimentu ne’e, atu ami realiza fali enkontru hodi halo levantamentu osan ba osan restu, nune’e ba osan restu ne’ebé iha, ami sei deside ba adisionál para kontinua ke’e estrada kilómetru ida-resin tan no osan balun halo aloka ba ezgotu sira,” nia aprofunda.
José haktuir obra ke’e estrada foun nia orsamentu maihusi PNDS 2026 ne’ebé aloka bá suku Irabin de Baixo ho totál rihun $27 no osan restu $10.000,00.
Tuir dadus, populasaun Suku Irabin de Baixo hamutuk 2.624 no aldeia hamutuk hitu kompostu husi aldeia Taradiga, Macausa, Macaqui, Beturia, Uatodere, Taradai no Lacoloro Hoo.
Jornalista: Vitorino Lopes da Costa
Editór: Xisto Freitas da Piedade
