Governadór BCTL aprezenta dezempeñu fundu petrolíferu-revizaun ekonómika ba KM
DILI, 16 Setembru 2026 (TATOLI)—Governadór Banku Sentrál Timor-Leste (BCTL), Hélder Lopes,kuarta ne’e, iha reuniaun Konsellu Ministru aprezenta kona-ba dezempeñu Fundu Petrolíferu no Revizaun Ekonómika husi semestre dahuluk tinan 2026 no rezultadu husi Relatóriu Avaliasaun Mútua ba Konsellu Ministru, kona-ba medida kombate brankeamentu kapitál no finansiamentu terorizmu iha Timor-Leste.
“Iha reuniaun Konsellu Ministru ne’e, Governador Banku Sentrál Timor-Leste (BCTL) aprezenta kona-ba fundu mina-rai to’o iha fulan-Juñu 2026, tantu ita hotu hatene katak iha fulan-Juñu liu ba ita-nia fundu petroleu iha ita-nia Banku Federal Amérika ne’e iha biliaun $18.4,” Sekretáriu Estadu Komunikasaun Sosial, Expedito Dias Ximenes ba jornalista sira, iha Palasiu Governu, ohin.
Nia dehan, Governadór Banku Central hato’o mós relatoriu avaliasaun brankeamentu kapitál no finansiamentu terrorizmu ne’ebé durante ne’e BCTL halo monitorizasaun evolusaun ne’ebé mak la’o iha mundu.
“Governadór BCTL mós aprezenta kona-ba termu ekonomia Timor-Leste nian ne’ebé mak la’o durante tinan barak nia laran,” nia informa.
Tuir nota iha portal Governu ne’e haktuir, Fundu Petrolíferu iha finál-Juñu 2026, rejista saldo maizumenus biliaun $18,43, kompara ho biliaun $18,31 ne’ebé rejista iha trimestre dahuluk nia rohan.
Iha trimestre daruak, investimentu Fundu ne’e rejista retornu maizumenus millaun $719, liuliu impulsiona husi dezempeñu investimentu iha asaun. Iha semestre dahuluk, transfere ona millaun $800 husi Fundu ne’e hodi finansia despeza Orsamentu Jerál Estadu.
Aprezentasaun ne’e destaka mós redusaun reseita petrolífera no importánsia ne’ebé aumenta husi rendimentu investimentu ba sustentabilidade no prezervasaun patrimóniu Fundu nian.
Jornalista : Felicidade Ximenes
Editór : Cancio Ximenes
