Governu aprova dekretu-lei rejime kontratasaun advogadu ba reprezentasaun forense Estadu
DILI, 16 Setembru 2026 (TATOLI)—Governu liuhusi reuniaun Konsellu Ministru, kuarta ne’e, aprova projetu Dekretu-Lei ne’ebé aprezenta husi Ministru Prezidénsia Konsellu Ministru, Agio Pereira, kona-ba rejime selesaun no kontratasaun advogadu ba reprezentasaun forense Estadu.
“Dekretu-Lei ida-ne’e estabelese prosedimentu atu hili no kontrata advogadu ka sosiedade advogadu ida atu garante reprezentasaun legál no patrosíniu forense Estadu nian iha tribunál judisiál no arbitrajen nia oin, liuliu iha prosesu sira-ne’ebé nia kompleksidade espesiál ka relevánsia ba Estadu, presiza uza reprezentasaun jurídika espesializada,” refere komunikadu imprensa ne’ebé TATOLI asesu, ohin.
Prosesu sira-ne’e inklui entre sira seluk, kazu sira ho kompleksidade faktuál ka téknika ne’ebé aas, ne’ebé envolve asuntu espesializadu tebes, akontese iha tribunál estranjeiru, tribunál arbitrajen ka instánsia internasionál sira, ne’ebé bele iha impaktu finanseiru signifikativu ba Orsamentu Jerál Estadu nian ka ne’ebé envolve informasaun klasifikada, konfidensiál ka sensivel.
Kualifikasaun ba prosesu hanesan iha kompleksidade espesiál ka relevánsia halo liuhusi despaixu fundamentadu hosi Primeiru-Ministru, tuir proposta husi membru Governu ne’ebé tulun nia iha Prezidénsia Konsellu Ministru, husi membru Governu ne’ebé responsável ba área refere, ka husi entidade ne’ebé iha interese ba prosesu ne’e.
Advogadu ne’ebé atu kontrata tenke iha pelumenus esperiénsia tinan lima iha área direitu ne’ebé espesífiku ne’ebé relasiona ho prosesu ne’e no iha domíniu pelumenus iha lian ofisiál rua ne’e ida.
Iha kazu (prosesu) sira-ne’ebé akontese iha rai-li’ur ka iha lian estranjeiru, nia tenke domina lian ne’ebé uza iha prosesu ne’e. Diploma ne’e mós estabelese regra sira ne’ebé ho objetivu atu prevene konflitu interese iha kontratasaun.
Nomeasaun ba mandatáriu judisiál ne’e hala’o liuhosi despaxu fundamentadu husi Primeiru-Ministru ne’ebé bele delega kompeténsia ida-ne’e ba membru Governu ne’ebé koadjuva nia iha Prezidénsia Konsellu Ministru.
Iha kazu urjénsia, nomeasaun bele halo husi membru Governu ida-ne’e, ne’ebé tuirmai informa ba Primeiru-Ministru. Ho aprovasaun ba diploma ida-ne’e, revoga tiha Dekretu-Lei númeru 16/2012, loron 4 fulan-Abríl, relasiona ho Reprezentasaun Estadu nian iha Tribunál.
Jornalista : Felicidade Ximenes
Editór : Cancio Ximenes
