MOP reabilita estrada Koléjiu-Lugululi, fasilita movimentasaun komunidade
BOBONARU, 16 Setembru 2026 (TATOLI) – Ministériu Obra Públika (MOP) hahú reabilita estrada rurál ligasaun husi Koléjiu ba aldeia Lugululi, suku Manapa, postu administrativu Kailaku, munisípiu Bobonaru, ho distánsia besik kilómetru tolu ho objetivu atu fasilita movimentasaun komunidade, liuliu ba atividade ekonómika, saúde, edukasaun no nesesidade sira seluk.
Obra ne’e uza sistema Fiber Reinforced Concrete (FRC) no ezekuta husi empreza Aljiu Unipessoal, Lda. JV Lica-Tada Unipessoal, Lda. Daudaun ne’e, reabilitasaun estrada ne’e to’o ona iha faze halo bee-dalan no muru beton nu’udar preparasaun ba servisu cor beton.
Komunidade Lugululi, Saturina Araújo Bili, orgulu no konsidera asaun ne’ebé Governu halo bele responde ona sira-nia preukupasaun durante tinan 20-resin, tanba estrada iha área ne’e sai dezafiu ba movimentasaun lokál.
“Ami kontente tanba Governu halo ona estrada di’ak mai ami. Tinan 20-resin ona ami komunidade iha ne’e susar tanba tahu sa’e mai ne’e maka’as, liuliu tempu udan, ami la’o bá-mai la di’ak. Maliana besik hela más udan ami labele bá, tanba estrada la di’ak, tahu maka’as”, nia dehan.
Iha oportunidade hanesan, komunidade seluk, Carlito Serafim, dehan reabilitasaun estrada ne’e lori mudansa ba movimentasaun komunidade, inklui fasilita lori produtu lokál atu fa’an iha merkadu Maliana.
“Agora ami sente di’ak ona, tanba Governu halo ona estrada. Ami bele lori ami-nia produtu lokál sira atu fa’an iha merkadu Maliana. Uluk ami susar duni tanba tahu no dalan aat”, nia realsa.
Nia mós hatete katak kondisaun estrada aat antes ne’e afeta asesu komunidade bá servisu saúde, inklui bainhira ema moras ka inan isin-rua presiza ba ospitál.
“Dalaruma inan sira atu partu, tula ho motór la di’ak. Ami hulan de’it bá to’o ospitál. Agora, dalan di’ak hanesan ne’e, bainhira moras ami bele bolu karreta ambulánsia mai liu”, nia hatete.
Reabilitasaun estrada ne’e bele remata tuir tempu ne’ebé determina, atu garante movimentasaun ne’ebé seguru no fásil ba komunidade Lugululi no aldeia sira iha suku Manapa.
Enkuatu projetu reabilitasaun estrada ne’e implementa ho totál orsamentu $621.613,03 ho durasaun kontratu tinan ida.
Notísia relevante: Projetu estrada rurál kilómetru 18,45 iha Bobonaru hahú implementa
Jornalista: Sergio da Cruz
Editora: Maria Auxiliadora
