Orsamentu indemnizasaun ba afetadu reabilitasaun estrada urbana Baukau hamutuk $179.374,88
BAUKAU, 16 Setembru 2026 (TATOLI)—Governu liuhusi Ministériu Obra Públika (MOP), aloka orsamentu hamutuk $179.374,88 atu indemniza komunidade afetada hamutuk na’in-56 husi projetu reabilitasaun estrada urbana iha Baukau Vila.
“Governu hahú prepara ona indemnizasaun atu halo transferénsia, no prosesu ne’e iha ona nivel nasionál. Ami iha munisípiu hanesan substitutu de’it. Afetadu sira kompostu husi Suku Tirilolo, Bahú no Builai balun,” Diretór Servisu Munisipál Obra Públika, Agostinho Ximenes, hateten ba jornalista TATOLI iha Vila Nova, Baukau, Kuarta-feira.
Agostinho Ximenes hateten, tuir dadus ne’ebé iha, afetadu na’in-56 ne’e kompostu husi afetadu 26 iha pakote dahuluk no 30 iha pakote daruak ne’ebé lakon kioske, ofisina, rezidénsia, moru, armazein, postu seguransa privadu, loja, rampa, baraka no estrutura sira seluk.
Nune’e, Ministériu Obra Públika, liuhusi Direksaun-Jerál Estrada, Ponte no Prevensaun no Kontrolu Inundasaun, hamutuk ho Diresaun Nasionál Planeamentu, Peskiza no Dezenvolvimentu, ramata ona prosesu rekoñesimentu no verifikasaun dadus komunidade afetada iha pakote dahuluk, husi Nargardjo to’o HoREX Baukau, ne’ebé envolve afetadu na’in-26.
Ba pakote dahuluk, estimasaun orsamentu espropriasaun hamutuk $89.032,88, inklui fundu kontinjénsia 10% ka $8.903,29, ho totál orsamentu $97.936,17.
Enkuantu, pakote daruak, ne’ebé kobre área husi rotunda Vila Nova to’o Igreja Visão Cristã, envolve afetadu na’in-30, ho estimasaun orsamentu espropriasaun privada hamutuk $74.035,19, fundu kontinjénsia 10% hamutuk $7.403,52, nune’e totál orsamentu ba pakote ne’e hamutuk $81.438,71.
“Afetadu sira konkorda katak projetu bele kontinua, no depoiz sira sei hetan indemnizasaun tuir pontu estrada ne’ebé afeta no tuir klase ka kategoria idaidak. Orsamentu mós sei aplika tuir kategoria ne’e,” Agostinho subliña.
Entretantu, projetu reabilitasaun estrada urbana iha Baukau atualmente tama iha faze implementasaun, ho estrada nia naruk hamutuk kilómetru 23.
Pakote dahuluk implementa husi JOVA Construction Unipesoál, Lda., ho valór kontratu $4.735.021,55, enkuantu pakote daruak implementa husi Vage’e Unipesoál, Lda., ho valór kontratu $3.768.933,21. Projetu rua ne’e nia durasaun implementasaun hamutuk tinan rua.
Jornalista: Natalino Belo
Editór: Xisto Freitas da Piedade
