Prezidénsia Repúblika apoiu fundu no materiál konstrusaun ba Kapela São José Irabele
VIKEKE, 16 Setembru 2026 (TATOLI)—Xefe Suku Irbin de Cima, Postu Administrativu Uatukarbau, Munisípiu Vikeke, Lino Martins, informa Prezidénsia Repúblika apoiu fundu no materiál konstrusaun ba Suku Irabin de Cima hodi konstrui Kapela São José Irabere.
“Ami hetan fundu hamutuk rihun $2. Nune’e, foin lalais iha semana kotuk ekipa Prezidénsia Repúblika liuhusi Unidade Servisu Sosiedade Sivíl no Asuntu Sosiál (SSSAS) lori tan materiál konstrusaun hanesan simentu, besi, azuleju, kalén no tinta, atu ajuda konstrusaun kapela. Maibé, kada kuantidade materiál sira-ne’e ha’u ladún hatene tanba materiál barak loos ne’ebé ha’u la konta,” Lino Martins ba TATOLI, iha Postu Uatukarbau, Kuarta ne’e.
Autoridade komunitária ne’e dehan konstrusaun ba kapela besik konklui ona, kuaze atinje 80%, tanba hela pinta, taka keramik no plafon.
“Nune’e, ba materiál konstrusaun ne’ebé ekipa Prezidénsa Repúblika foin lalais oferese tan ba ami ne’e, atu ami konstrui sanitária iha kapela nian, hodi sarani sira mai rona misa iha kapela karik bele asesu,” nia subliña.
Lino relata medida konstrusaun Kapela São José Irabere ho nia naruk totál metru 22 no luan metru hamutuk 12 ne’ebé sei sufisiente ba sarani sira husi Suku Irabin de Cima asesu ba misa ne’ebé realiza iha kapela.
Tuir dadus, populasaun husi Suku Irabin de Cima ne’ebé sai benefísiu ba kapela ne’e ho totál hamutuk na’in-1.000 no totál uma-kain hamutuk 573 husi aldeia hamutuk lima (5) kompostu husi Caida Ho O (Caidaho’o), Tetumori, Uatubita, Marra’e no Cao Oli O (Cai-Oliho’o).
Jornalista: Vitorino Lopes da Costa
Editór: Xisto Freitas da Piedade
