Ramos-Horta: Relasaun Timor-Leste no Malázia transforma ba parseria ne’ebé luan liu
DILI, 16 Setembru 2026 (TATOLI) – Prezidente Repúblika, José Ramos-Horta, fó-sai katak Relasaun entre Timor-Leste no Malázia transforma ba parseria ne’ebé laun liu iha kooperasaun oioin.
Prezidente Repúblika, José Ramos-Horta, agradese ba Malázia nia apoiu durante prosesu independénsia Timor-Leste no iha períodu konstrusaun Estadu.
Prezidente Ramos – Horta hateten, Malázia halo papél importante iha manutensaun pas depois Konsulta Populár 1999 no mós fó kontribuisaun relevante ba dezenvolvimentu administrasaun públika, edukasaun no reforsu kapasidade institusionál Timor-Leste.
“Relasaun entre Timor-Leste no Malázia agora transforma ona ba parseria ida ne’ebé luan liu no orientadu ba futuru,” Xefe Estadu hato’o felisitasaun ne’e liuhusi selebrasaun Loron Nasionál Malázia ba dala-69 no Malaysia Day iha Spring Palm Hotel Fatuhada, kuarta ne’e.
Xefe Estadu ne’e salienta, kooperasaun entre nasaun rua atualmente abranje área edukasaun, saúde, defeza no seguransa, komérsiu, investimentu, turizmu, agrikultura, teknolojia no konetividade aérea.
Nia refere mós katak Akordu Servisu Aéreu entre nasaun rua fasilita ligasaun direta Dili-Kuala Lumpur, ne’ebé kontribui ba aumentu atividade turizmu, negósiu, edukasaun no investimentu.
Kona-ba ASEAN, Ramos-Horta agradese Governu Malázia no Primeiru-Ministru Anwar Ibrahim ba apoiu forte ne’ebé fó durante prosesu adezaun Timor-Leste ba organizasaun rejionál ne’e.
Prezidente hateten Timor-Leste sei kontinua serbisu hamutuk ho Malázia atu hametin sentralidade ASEAN, promove integrasaun ekonómika no asegura estabilidade no prosperidade iha Sudeste Aziátiku.
Nia aumenta katak Timor-Leste hein atu aprofunda tan kooperasaun iha setór enerjia, infraestrutura, agrikultura, saúde, ekonomia dijitál no dezenvolvimentu Greater Sunrise, no mós atrai investimentu Malázia ne’ebé boot liu iha futuru.
Selebrasaun Loron Nasionál Malázia ba dala-69 ne’e marka mós etapa foun ida iha relasaun entre nasaun rua, ho kompromisu atu transforma amizade istórika ne’ebé kleur ona ba parseria ekonómika no estratéjika ida ne’ebé fó benefísiu ba povu Timor-Leste no Malázia.
Embaixadór Malázia iha Timor-Leste, Fairuz Adli bin Mohammed Rozali, hateten Malázia sente onra tanba durante nia Prezidénsia ASEAN iha tinan 2025, organizasaun rejionál ne’e simu Timor-Leste sai membru foun ASEAN.
“Malázia no Timor-Leste la’ós deit belun no viziñu rejionál, maibé parseiru sira ne’ebé tuur hamutuk iha meza ASEAN ida deit,” dehan Embaixadór ne’e.
Nia esplika relasaun bilaterál entre nasaun rua ne’e kontinua dezenvolve liuhusi asina memorandu entendimentu iha área edukasaun superiór, telekomunikasaun, dezenvolvimentu informasaun no mídia, dezenvolvimentu rurál no defeza.
Embaixadór Fairuz, enfatiza durante Malázia nia Prezidénsia ASEAN, governu Malázia mós simu funsionáriu públiku timoroan sira iha programa formasaun no estájiu atu prepara sira ba responsabilidade ASEAN, alende promove konetividade liuhusi vou direta entre Kuala Lumpur no Dili.
Jornalista: Camilio de Sousa
Editór: Evaristo Soares Martins
