TL kumprimenta norma internasionál atu kombate brankeamentu kapitál-finansiamentu terorizmu
DILI, 16 Setembru 2026 (TATOLI)—Governu liuhusi reuniaun Konsellu Ministru, kuarta ne’e, apoia rekomendasaun Komisaun Nasionál ba Implementasaun Medida Kombate Brankeamentu Kapitál no Finansiamentu Terorizmu (CNCBC) kona-ba adosaun Relatóriu Avaliasaun Mútua Timor-Leste 2024, Planu Estratéjiku Nasionál 2025–2028 no Relatóriu Avaliasaun Nasionál Risku 2025.
Relatóriu ne’e analiza Timor-Leste nia kumprimenta ba norma internasionál atu kombate brankeamentu kapitál no finansiamentu terorizmu. Avaliasaun ne’e identifika mós área sira-ne’ebé presiza reforsu inklui supervizaun, prevensaun, investigasaun, rekuperasaun no konvikasaun ativu.
“Timor-Leste hala’o avaliasaun ne’e hamutuk ho Asia Pacific Group (APG) no sei kontinua hametin medida sira ba prevensaun brankeamentu kapitál,” Ministru Justisa, Sérgio Hornai, hateten ba jornalista sira iha Palasiu Governu,ohin.
Tuir relatóriu, Timor-Leste kumpre kompletamente ona ka parte boot rekomendasaun 22 husi rekomendasaun 40 Grupu Asaun Finanseira (GAFI) nian, ho 12 seluk kumpre ona parsialmente.
Tuir nota iha portal Governu ne;e, Ministériu Justisa aprezenta rezultadu Avaliasaun Mútua ne’ebé hala’o husi Grupu Ázia-Pasífiku kona-ba Brankeamentu Kapitál (APG), ne’ebé analiza Timor-Leste nia grau kumprimentu ba norma internasionál hodi kombate brankeamentu kapitál no finansiamentu terrorizmu.
Avaliasaun ne’e konklui katak Timor-Leste kumpre kompletamente ona ka parte boot rekomendasaun 22 husi rekomendasaun 40 Grupu Asaun Finanseira (GAFI) nian, ho 12 seluk kumpre ona parsialmente.
Identifika mós área sira-ne’ebé presiza reforsu liuliu kona-ba supervizaun, prevensaun, investigasaun, rekuperasaun no konvikasaun ativu nomós aplikasaun sansaun finanseira. Iha ámbitu ida-ne’e, ko’alia mós medida ne’ebé ho objetivu atu hatán ba rekomendasaun husi avaliasaun liuhusi reforsu kuadru legál no institusionál, avaliasaun nasionál ba risku, koordenasaun entre entidade kompetente nomós implementasaun planu estratéjiku nasionál ida.
Hafoin aprezentasaun, Konsellu Ministru apoia rekomendasaun sira husi Komisaun Nasionál ba Implementasaun Medida Kombate Brankeamentu Kapitál no Finansiamentu Terrorizmu (CNCBC), ne’ebé lidera husi Ministru Justisa, Sérgio de Jesus Fernandes da Costa Hornai, kona-ba adosaun Relatóriu Avaliasaun Mútua Timor-Leste 2024, Planu Estratéjiku Nasionál 2025–2028 no Relatóriu Avaliasaun Nasionál Risku 2025 no ninia aneksu sira, no mós autorizasaun ba publikasaun relatóriu ikus nian.
Jornalista : Felicidade Ximenes
Editór : Cancio Ximenes
