ANM-PNTL sensibiliza regulamentu transportasaun materiál konstrusaun ba Autoridade Kovalima
KOVALIMA, 17 Setembru 2026 (TATOLI) – Autoridade Nasionál Minerál (ANM) hamutuk ho Polísia Nasionál Timor-Leste (PNTL), kinta-ne’e, realiza atividade sensibilizasaun kona-ba regulasaun transportasaun materiál konstrusaun, inklui fatuk, rai-henek no rai ba autoridade postu administrativu, xefe suku no Polísia Suku (PS) iha Munisípiu Kovalima.
Reprezentante Prezidente Autoridade Munisípiu Kovalima, Alberto Moniz de Araújo, hateten atividade sensibilizasaun ka ne’e importante atu fahe informasaun ba autoridade lokal no komunidade kona-ba regra transportasaun materiál minerál no konstrusaun.
Nune’e, nia hato’o apresiasaun ba ANM no PNTL ne’ebé servisu hamutuk atu fó orientasaun ba komandante eskuadra, Administradór postu administrativu, xefe suku no komandante PS sira kona-ba kontrolu transportasaun materiál konstrusaun iha territóriu Kovalima.
“Importante tebes atu autoridade lokál sira kontinua fahe informasaun ne’e ba komunidade liuliu bainhira transporta fatuk no rai-henek liuhusi estrada públika. Transportasaun tenke tuir Kódigu Tránzitu no regra ANM atu evita materiál nakfakar iha estrada no hamosu risku ba sidadaun sira ne’ebé uza estrada,” nia hatete.
Alberto mós husu autoridade lokal no xefe suku sira atu kontinua sensibiliza ba komunidade kona-ba responsabilidade bainhira uza estrada públika, inklui asegura katak todan materiál ne’ebé tula iha kamioneta la liu kapasidade transporte.
Iha fatin hanesan, Komandante PNTL Munisípiu Kovalima, Superintendente Xefe Paulino Carmo Ferreira, hatete atividade ne’e importante atu ajuda empreza sira komprende oinsá atu jere no halo transportasaun materiál konstrusaun ho seguru.
Iha Kovalima, Komandante PNTL Kovalima ne’e dehan movimentu transportasaun materiál ne’ebé maka’as, liuliu tanba atividade empreza sira no implementasaun projetu Suai Supplay Base, ne’ebé aumenta movimentu kamioneta hodi transporta materiál konstrusaun sira.
“Ita seidauk iha koñesimentu naton kona-ba oinsá atu halo kontrolu no jestaun transportasaun materiál sira ne’e. Tanba ne’e, atividade hanesan ida-ne’e importante atu empreza sira hatene no kumpre regra transportasaun,” nia hatete.
Iha sorin seluk, Xefe Departamentu Protesaun Natureza no Ambiente, Superintendente Polísia Inácio Amaral esplika katak regulasaun transportasaun no atividade minerasaun iha baze ne’ebé tenke kumpre.
Tuir Dekretu-Lei Númeru 34 kona-ba PNTL no Dekretu-Lei Númeru 13/2005 kona-ba Kódigu Prosesu Penál, ne’ebé iha Artigu 52 fó kompeténsia ba PNTL atu halo atuasaun tuir lei.
“Dekretu-Lei Númeru 19/2009 kona-ba Kódigu Penál mós regula kona-ba krime hasoru ambiente. Bainhira atividade minerasaun hala’o no hamosu asaun ne’ebé viola lei ka prejudika ambiente bele tama iha responsabilidade tuir lei,” katak nian.
Atividade sensibilizasaun ne’e envolve autoridade postu administrativu, xefe suku no Polísia Suku sira atu hametin koordenasaun no partilla informasaun ba komunidade kona-ba transportasaun materiál konstrusaun ho responsabilidade no tuir regra sira ne’ebé vigora.
Jornalista: Celestina Teles
Editór: Florencio Miranda Ximenes
