APC rejista uma 58 hetan estragu kauza husi anin-boot iha Baukau
BAUKAU, 17 Setembru 2026 (TATOLI)—Autoridade Protesaun Sivíl (APC-sigla portugeza) rejista uma komunidade hamutuk 58 hetan estragu kauza anin-boot durante loron tolu ne’ebé akontese iha Munisípiu Baukau.
Komandante Operasaun Autoridade Protesaun Sivíl (APC) Munisípiu Baucau, Francisco Viana Freitas esplika, dadus hirak-ne’e rejistadu bainhira akontense anin-boot ne’ebé akontese husi 13-16 Setembru 2026.
“Ami rekolla ona dadus purvolta família 58, maioria iha Kelikai,” Komandante Operasaun APC informa iha ninia kna’ar fatin Vila antiga, Kinta ne’e.
Viana relata uma ne’ebé estragu rejistadu iha Postu Kelikai hamutuk 22, Postu Matebian 12 no 24 iha postu seluk no hatutan katak APC seidauk halo verifikasaun hodi kategoriza ba estragu kamaan, natoon no totál.
Nia esplika proprietáriu sira-ne’ebé hetan estragu kompostu husi uma, armazein no koziña, iha-ne’ebé provizoriamente seidauk distribui apoiu emerjénsia ba vítima sira tanba estoke laiha.
“Kuandu foos mai ona ita halo distribuisaun hodi apoiu vítima afetada sira,” Viana akresenta.
APC Baukau apela ba komunidade atu prevene aan husi dezastre naturál liuliu anin-boot ne’ebé atualmente akontese iha Munisípiu Baukau no apela mós atu evita sunu rai arbiru no tesi ai arbiru tanba sei hamosu inséndiu, inundasaun no erozaun.
Jornalista: Natalino Belo
Editór: Xisto Freitas da Piedade
