Autoridade Vikeke lansa laboratóriu pedagojia iha EBC 01 Baimeta
VIKEKE, 17 Setembru 2026 (TATOLI)—Autoridade Munisípiu Vikeke, Kinta ne’e, lansa laboratóriu pedagojia iha eskola Ensinu Báziku Sentrál (EBC-sigla poturgeza) 01 Baimeta, Postu Vikeke Vila.
Iha lansamentu ne’e, Reprezentante Prezidente Autoridade Munisípiu Vikeke, Júlio Sakadura, hateten laboratóriu ne’e importante tebes ba estudante sira, atu estudante sira labele aprende teoria de’it, maibé pratika teoria iha laboratóriu atu hasa’e estudante sira-nia koñesimentu.
Nia solisita profesór sira tenke kuida laboratóriu ho di’ak hodi utiliza ba estudante sira tanba estudante sira-ne’e mak futuru ba nasan Timor-Leste.
Iha fatin hanesan, Diretór EBC 01 Baimeta, Abílio da Costa Baptista haktuir, laboratóriu ne’e apoia husi Geelong Austrália liuhusi Eskola Koléjiu São José Austrália.
“Ohin ami hetan oportunidade di’ak ba ami-nia eskola. Tanba ami bele hetan ekipamentu laboratóriu nian husi Geelong Austrália liuhusi Eskola Kolegiu Sekundáriu São José Austrália. Ami hakarak hato’o agradesimentu ba Geelong no Eskola Koléjiu São José Australia ne’ebé apoia ami estabelese laboratóriu,” nia hato’o.
Abílio informa katak laboratóriu ne’e fasparte ba pedagójika nian ne’ebé estudante sira hetan matéria iha saladeaula kontinua ba pratika kedas iha laboratóriu.
Iha biban hanesan, Sekretáriu Comunity Geelong Austrália, Mery Melone subliña, Koléjiu São José sente onradu tebes mai partisipa lansamentu laboratóriu iha Eskola EBC 01 Baimeta.
“Ami sente onradu tebes hodi partisipa iha lansamentu laboratóriu ne’ebé hetan suporta husi Geelong. Antes ne’e, Geelong halo ona ligasaun ho eskola EBC 01 Baimeta, nune’e liuhusi apoia sira-ne’e estudante sira bele aprende ho di’ak liután,” nia tenik.
Nia esplika estudante sira sei pratika iha laboratóriu liliu ba matéria sira hanesan matemátika, fízika, kímika no matéria sira seluk.
Entretantu, laboratóriu ne’e sei benefísia estusdante EBC 01 Baimeta husi primeiru síklu to’o terseiru síklu ho totál hamutuk na’in-341.
Partisipa iha lansamentu laboratóriu ne’e kompostu husi reprezentante Servisu Edukasaun Munisípiu Vikeke, ekipa Geelong Austrália, estudante Koléjiu São José Australia inklui profesór, veteranu no estudante sira husi EBC Kabira-oan, EBC 01 Baimeta, estudante Ensinu Sekundáriu 04 Setembru no estudante Ensinu Sekundáriu Kalixá.
Jornalista: Vitorino Lopes da Costa
Editór: Xisto Freitas da Piedade
