CNE sosializa lala’ok eleisaun ba alunu eskola KAFE iha Kovalima
KOVALIMA, 17 Setembru 2026 (TATOLI) – Komisaun Nasionál ba Eleisaun (CNE) sosializa lala’ok eleisaun ba alunu sira iha Eskola Kafe, Munisípiu Kovalima, atu aumenta sira-nia komprensaun kona-ba demokrasia no partisipasaun iha prosesu eleitorál.
Komisáriu Destakadu CNE Ainaro-Kovalima, Elvino Bonaparte do Rego, hatete katak atividade ne’e objetivu atu fahe informasaun ba alunu sira kona-ba importánsia atu partisipa iha festa demokrasia no komprende prosesu eleisaun.
“Ami hala’o programa edukasaun sivika ba alunu sira husi Eskola Kafe ho objetivu atu fahe informasaun, nune’e alunu sira komprende festa demokrasia no eleisaun ne’ebé sei akontese iha futuru,” dehan Elvino ba jornalista sira iha Salaun CNE Kovalima.
Nia hatete katak edukasaun sivika ne’e importante atu alunu sira bele rona no analiza informasaun, foti desizaun no ezerse sira-nia direitu ho responsabilidade bainhira partisipa iha eleisaun.
Aleinde ne’e, CNE mos fó informasaun kona-ba programa Resensiamentu Eleitorál Apoiu Base Dadus (REABD), ne’ebé hala’o ho apoiu husi STAE, atu ajuda sidadaun sira kumpri lei no rejista nu’udar eleitor, nune’e bele partisipa iha eleisaun laiha problema.
Iha atividade ne’e,Reprezentante Administradór Postu Administrativu Suai, Vítor Gomes, enkoraja alunu sira atu kontinua fahe informasaun kona-ba lala’ok eleisaun ba inan-aman sira, atu kontribui ba partisipasaun sidadaun iha prosesu eleitorál.
“Ha’u hakarak fó hanoin ba ita-boot sira kona-ba lala’ok eleisaun. Ita sei hasoru eleisaun no alunu sira-nia papél importante. Tanba ne’e, kontinua fahe informasaun kona-ba lala’ok eleisaun ba inan-aman sira atu sira partisipa másimu iha eleisaun,” dehan Vítor.
Notisia relevante: CNE Baukau realiza edukasaun sívika ba votante foun iha Laga
Jornalista: Celestina Teles
Editór: Florencio Miranda Ximenes
