Konstrusaun postu no rezidénsia pesoál saúde iha Ossoala hahú ona
BAUKAU, 17 Setembru 2026 (TATOLI)—Kompañia responsável hahú implementa projetu konstrusaun postu saúde no rezidénsia pesoál saúde iha Suku Ossoala, Postu Administrativu Vemasse, Munisípiu Baukau.
Xefe Suku Ossoala, Francisco Gama da Costa Lobo, esplika projetu rua referida finansia husi Autoridade Munisipál Baukau (AMB) liuhusi Programa Dezenvolvimentu Integradu Munisipál (PDIM) iha-ne’ebé responsabiliza husi kompañia rua hanesan konstrusaun postu saúde no rezidénsia ba pesoál saúde lokaliza iha área Uatutogu, Aldeia Hoineuai.
“Konstrusaun hahú ona. Tuir kalkulasaun husi téknika sira katak progresu konstrusaun atualmente atinje ona pursentu 11,” Xefe Suku Ossoala informa iha Sentru Konvensaun Baukau (CCB-sigla portugeza), Vila Antiga, Kinta ne’e.
Lobo relata uma ba pesoál saúde hamutuk rua, kompleta ho kuartu rua, koziña no sanitáriu ho medida metru 9.5×8.5, responsabiliza husi kompañia PLANALTO STAR, Unip, Lda ho valór orsamentu $115.931,19 no durasaun kontratu tinan-ida.
Projetu konstrusaun postu saúde implementa husi kompañia PALUMBEL, Unip, Lda ho medida metru 15.5×12.7 iha-ne’ebé durasaun tinan-ida ne’ebé sei gasta orsamentu hamutuk $177.923,28.
“Ida-ne’e bele responde ona komunidade nia ezijénsia tanba kompleta ho rezidénsia ba pesoál saúde ne’ebé sai preokupasaun ba profisiónal saúde durante ne’e,” Lobo haktuir.
Entretantu, Suku Ossoala hamutuk aldeia haat kompostu husi Hoineuai, Kaidenulale, Uma-Ana Iku, Lulinunu no Uaiknase ho totál populasaun hamutuk 2.114.
Jornalista: Natalino Belo
Editór: Xisto Freitas da Piedade
