Servisu Migrasaun emite vistu turista 135.170 durante fulan-ualu
DILI, 17 Setembru 2026 (TATOLI)—Servisu Migrasaun emite ona vistu turista hamutuk 135.170 durante fulan-ualu ikus.
“Emisaun vistu ne’ebé Servisu Migrasaun hasai liliu ba vistu turista hamutuk 135.170, ne’e hahú husi Fulan-Janeiru to’o Agostu,” Diretór Ezekutivu Servisu Migrasaun, Komisáriu Asistente Polísia Jorge Monteiro informa ba jornalista sira liuhusi konferénsia imprensa ne’ebé hala’o iha nia knaar fatin, Vila-Verde, Kinta ne’e.
Aleinde ne’e, emisaun ne’e ho kategoria vistu traballu ba ema estranjeiru hamutuk 392.600, vistu traballu renovasaun 201.600, vistu negósiu klase dois iha 4.350, vistu temporáriu iha ema na’in-46.550, vistu ba rezidénsia 2.050, vistu autorizasaun rezidénsia iha territóriu nasionál hamutuk 120.000.
Notísia relevante :
Jorge Monteiro dehan, Servisu Migrasaun konsege rekuza sidadaun estrajeiru nia entrada mai iha territóriu nasionál.
“Klaru iha sidadaun estranjeiru ne’ebé mak tama iha ita-nia territóriu nasionál Timor-Leste balun ita aplika rekuza entrada iha territóriu nasionál Timor-Leste. Ita aplika tanba rekezitu atu tama iha territóriu nasionál ne’ebé sira la priense, nune’e entre períodu Janeiru to’o Agustu 2026 ita halo rekuza entrada ba sidadaun hamutuk 82,” nia relata.
Servisu Migrasaun rekuza tama territóriu nasionál tanba sidadaun sira la kumpre Lei Migrasaun Azilu bainhira tama iha iha pontu entrada sira.
“Kuandu ita halo pasa revista ba sira-nia dokumentu viajen, sira la priense rekezitu husi Lei Migrasaun Azilu ne’ebé define iha pontu entrada sira,” nia katak.
Sidadaun sira ne’ebé viola vistu ou hela ilegalmente iha territóriu nasionál ne’e sei hetan sansaun.
“Ita aplika espulsaun administrativu ba sidadaun sira husi territóriu nasionál nomós ita aplika situasaun abandona voluntáriu, ne’e ita bele husik territóriu nasionál Timor-Leste ho voluntáriamente,” nia katak.
Jornalista : Natalino Costa
Editora : Julia Chatarina
