Aplikante 33 ba vaga Juíz STJ submete ba teste eskrita

DILI, 18 Setembru 2026 (TATOLI)—Aplikante 33 ba vaga Juíz Supremu Tribunál Justisa (STJ), Sesta ne’e, submete ona ba prosesu teste eskrita iha Sentru Formasaun Jurídiku Judisiáriu.

Teste eskrita ne’e juri hahú hola fatin iha sala teste iha tuku 07:00 dadeer no kandidatu sira tama hola hola fatin, hahú tuir ezame no halo kedan teste eskrita iha tuku 12:30. Teste sei kontinua iha loron 21 Setembru no iha loron 25 no 28 sei realiza teste ba Juiz Tribunál Rekursu (TR).

“Ohin dadeer ha’u mai, ha’u la lembra totál hirak mak tuir, maibé tuir iha teste ne’e iha na’in-33, sira kompletu. Sira tuir hotu teste, liliu ba sira ne’ebé mak admitidu,” Prezidente Komisaun Rekrutamentu no Selesaun ba Juíz STJ no TR, Avelino Coelho, hateten, ba jornalista sira iha Sentru Formasaun Jurídiku Judisiáriu, Kaikoli.

Aplikante sira ne’e mak hanesan Juíz Afonso Carmona, Albertina da Conceição das Neves, Ana Paula Fonseca Monteiro de Jesus, António Hélder Viana do Carmo, António José Fonseca Monteiro de Jesus, Argentino Luisa Nunes, Deolindo dos Santos, Duarte Tilman Soares, Edite Palmira dos Reis, Ersília de Jesus, Florencia Freitas Soares, Francisca Marques Cabral, Hugo da Cruz Pui, Ivan José Suritay Patrocínio Antonino, Jacinta Correia da Costa, João Ribeiro, José António de Jesus Escurial da Silva Faria, José Maria de Araújo, José Quintão Soares Celestino, Jumiaty Maria Freitas.

Juíza Maria Modesta de Almeida Vieira, Maria Natércia Gusmão Pereira, Maria Solana da Conceição Soares Fernandes, Samuel da Costa Pacheco, Sibruana da Costa, Zulmira Auxiliadora Barros da Silva.

Nune’e mós, Prokuradór Adérito António Pinto Tilman, Prokuradora Angelina Joanina Saldanha, Matias Soares, Vicente Fernandes e Brito.

Defensór Públiku Jerál, Cancio Xavier. Ema profisionál iha iha seitór justisa mak Bárbara Nazareth Andrade De Oliveira, Francisco José Ly de Sousa Assis NicolauJosé Pereira da Conceição.

Notísia relevante : Aplikante na’in-66 konkorre ba vaga Juíz STJ no TR

Avelino Coelho dehan, iha aplikante balun ne’ebé mak hili deziste hodi la tuir ezame teste ne’e.

“Konkursu ne’e direitu, ne’ebé mak Estadu fó atu hatuur Supremu Tribunál Justisa que emenda, tanba durante ne’e Tribunál Rekursu maka halao netik knaar balun iha Supremu Tribunál duni durante 24 anos,” nia akresenta.

Prezidente Komisaun reforsa, estabelesimentu Supremu Tribunál ne’e atu hadi’a sistema judisiária.

“Atu hadi’a ne’e presiza orgaun ida a’as liu. Supremu Tribunál ne’e kuartu órgaun de soberania, Supremu a’as liu, purtantu loke vaga ne’ebé ho objetivu ida-ne’e. Juíz ne’ebé ninian serbisu iha liu ona tinan-10 esperiénsia profisionál nia bele tuir ne’e, mas ne’e direitu,” nia katak.

Prokuradór Jerál Repúblika ne’ebé iha esperiénsia profisionál liu ona tinan-10 ne’e mós direitu tuir maibé bainhira la tuir mós laiha problema.

“Ne’e direitu, jurista méritu ne’ebé mak iha esperiénsia profisionál tinan-15 sira bele tuir. Nia ladún hatene sé maka hili deziste husi vaga ne’e, tanba naran ne’e iha hotu. juri sira mak hatene. Komisaun laiha koñesimentu tanba kandidatu sira-nia naran taka hotu iha Sentru Formasaun mak hatene, ne’e ami hatene sé sé,” Avelino Coelho informa.

Prezidente Komisaun garante katak prosesu teste ne’e sei la’o iha ámbitu transparansia nia laran no bainhira aplikante sira liu iha teste eskrita ne’e maka sei avansa ba teste orál ka entervista profisionál.

“Foin komisaun haruka relatóriu ba Konsellu Superiór tuir estatutu majistradu sira nian, Konsellu Superiór mak iha knaar atu halo promosaun ba Juiz hasa’e ka muda ne’e sira-nia kompeténsia. Ami sei halo relatóriu ba Konsellu Superiór, nune’e iha loron-30 halo desizaun atu nomea Juíz Konselleiru Juíz dDzembagadór haktuir ba lista ne’ebé maka juri fó, purtantu ne’e transparente,” nia tenik.

Tuir observsaun ne’ebé Jornalista Ajénsia TATOLI halo, nota katak iha tuku 10:00 dadeer Juiza Sribuana da Costa sai uluk husi aula teste nian no hetan akompañamentu husi médiku to’o lori nia karreta tanba kondisaun saúde ne’ebé la permite.

Hatán ba kestaun ne’e, Prezidente Komisaun, hateten, kuandu iha kandidatu ida mak nia kondisaun saúde la permite iha ámbitu teste ne’e la’ós responsabilidade Komisaun nian.

“Ne’e depende ba Juri, ne’e la’ós ona komisaun mak haree, se nia labele tuir teste Supremu nia bele tuir ezame ba iha Tribunál Rekursu. Ne’ebé loron ezame ne’e klaru ona,” nia hato’o.

Jornalista     : Natalino Costa

Editora          : Julia Chatarina