Autoridade Irabin de Cima prioriza konstrui sede aldeia
VIKEKE, 18 Setembru 2026 (TATOLI)—Xefe Suku Irabin de Cima, Postu Administrativu Uatukarbau, Munisípiu Vikeke, Lino Martins, informa Programa Nasionál Dezenvolvimentu Suku (PNDS) iha Suku Irabin de Cima tau prioridade ba konstrusaun Sede Aldeia Kaida Ho O.
“Ami prioriza sede aldeia. Ne’ebé, PNDS ba tinan 2026 ami atu konstrui Sede Aldeia Kaida Ho O. Sede aldeia ne’e sei benefísia populasaun aldeia lima tanba komunidade besik malu. Nune’e, bele utiliza ba atividade ruma ne’ebé iha,” Lino Martins ba TATOLI iha Postu Uatukarbau, Sesta ne’e.
Autoridade komunitária ne’e dehan katak daudaun ne’e sira komesa halibur materiál konstrusaun hanesan besi, fatuk, simente no rai-henek iha fatin konstrusaun, iha-ne’ebé iha semana ida-ne’e ita-nia badaen sira hahú konstrui sede aldeia, ho durasaun konstrusaun fulan tolu,” nia relata.
Lino haktuir sede aldeia atuál daudaun kondisaun aat, nune’e difikulta atendimentu populasaun iha-ne’ebá.
“Konstrusaun sede aldeia ho medida 8×6, ne’ebé sei konstrui husi ita-nia badaen lokál sira iha Suku Irabin de Cima. Ami sei akompaña prosesu konstrusaun atubele konklui iha tinan ida-ne’e,” nia hato’o.
Obra referida sei kompleta ho kuartu rua no sala ida, ne’ebé sei gasta orsamentu hamutuk $14.000,00.
Jornalista: Vitorino Lopes da Costa
Editór: Xisto Freitas da Piedade
