Jornalista sira husi ASEAN esplora robó ba diagnóstiku no teknolojia AI iha Guangxi 

NANNING (XINA), 18 Setembru 2026 (TATOLI) – Husi robó, ókulu tradusaun, no produsaun vídeo ba teknolojia ne’ebé tulun diagnóstiku moras, delegasaun jornalista ASEAN nian asiste diretamente aplikasaun oioin husi Intelijénsia Artifisiál (IA) ne’ebé dezenvolve iha Nanning, Rejiaun Autónoma Guangxi Zhuang, Xina.

Iha vizita ikus sidade Nanning, delegasaun vizita Sentru Kooperasaun Aplikasaun Intelijénsia Artifisiál Xina-ASEAN, plataforma ida ne’ebé dezenvolve husi Guangxi hodi haburas adosaun no kolaborasaun IA entre Xina no nasaun sira ASEAN nian.

Iha vizita ne’e, jornalista sira haree oinsá dezenvolvimentu AI ne’ebé la’ós de’it dezenvolve hanesan teknolojia dijitál, maibé aplika ativamente hodi hatán ba nesesidade umana no industriál oioin.

Delegasaun observa dezenvolvimentu sira ne’ebé varia husi robótika, teknolojia tradusaun lian nian, no dispozitivu eletróniku sira ne’ebé uza AI to’o sistema transporte intelijente sira, servisu kuidadu saúde nian, no produsaun drama badak sira uza plataforma AI ida ho naran NOVA.

Sentru kolaborasaun ne’e kompostu hosi área prinsipál tolu; Al Exhibition Hall, “Tree of Wisdom” Service Hall, no mós “Al Factory” nian ne’ebé kobre kadeia industriál ida ne’ebé varia husi prosesamentu dadus nian to’o implementasaun modelu linguajen boot sira.

Tuir informasaun sira ne’ebé fornese durante vizita, projetu IA doméstiku hamutuk 61 maka halo ona parseria ho sira ho husi númeru ne’e iha projetu 54 mak hala’o ona sira-nia operasionál. Projetu sira-ne’e foka ba área oioin, inklui smart city, embodied intelligence no Artificial Intelligence Generated Content (AIGC).

Delegasaun ne’e mós hetan informasaun kona-ba Nanning Gateway Bureau, instalasaun ida ne’ebé dezenvolve atu apoia tranzmisaun dadus transfronteirisu. Infraestrutura ida-ne’e bele hamenus laténsia tranzmisaun dadus entre Nanning no Hanoi, Vietname, ba maizumenus lima milisegundu.

Velosidade tranzmisaun sira hanesan ne’e konsidera hanesan krusiál atu apoia dezenvolvimentu kooperasaun dijitál Xina-ASEAN, partikularmente iha área sira hanesan kbiit komputasaun nian, finansa transfronteirisu, no telemedisina.

Iha domíniu dezenvolvimentu teknolojia lian nian, Guangxi mós introdús ona modelu lian boot ida naran Lao, hanesan parte ida husi esforsu sira hodi dezenvolve teknolojia sira AI nian ne’ebé adapta ba nesesidade sira husi nasaun sira ASEAN nian.

AI ajuda iha detesaun moras

Teknolojia ida ne’ebé dada delegadu sira-nia atensaun mak aplikasaun AI iha kuidadu saúde.

Jornalista sira hetan introdusaun ba sistema ida ne’ebé dezenvolve First Affiliated Hospital of Guangxi Medical University ka Ospitál Afiliadu Dahuluk husi Universidade Médika Guangxi nian ne’ebé dezeña atu ajuda deteta funsiona raan nian iha fuan no aten, partikularmente iha pasiente sira ho talasemia (tahalassemia).

Tuir matadalan, teknolojia ne’e utiliza IA hodi identifika área ne’ebé moras iha de’it segundu rua, fó ona rezultadu atinje porsentu 98.

Teknolojia ne’e rasik mós hamenus kustu maizumenus dois tersus, nune’e bele hamenus todan finanseiru ba pasiente sira.

Aleinde kuidadu saúde, AI mós aplika hela ba jestaun tráfiku. Sistema ne’e aproveita dadus boot no algoritmu sira hodi ajusta durasaun lampu tránzitu nian iha kruzamentu sira bazeia ba kondisaun veíkulu nian. Aplikasaun ida-ne’e reklama katak hadi’a efisiénsia tráfiku nian maizumenus pursentu 30.

Teknolojia IA nian mós dezenvolve hela atu apoia komérsiu transfronteirisu entre Xina no Vietname liuhusi “portu intelijente sira”. Sistema ne’e integra veíkulu sira ne’ebé laiha kondutór, radar, sensor vizuál sira bazeia ba IA, rede 5G, no sistema navegasaun BeiDou hodi transporta sasán sira enkuantu fasilita prosesu sira despaxu Alfándega nian.

Tuir informasaun sira ne’ebé fornese ba delegasaun, utilizasaun sistema ida-ne’e permite prosesu tomak husi transporte to’o kompleta formalidade Alfándega nian, atu hala’o iha maizumenus oras 24 nia laran, melloria signifikativu ida kompara ho prosesu anteriór, ne’ebé bele halo kondutór sira hein to’o loron tolu.

Jornalista sira mós koko dispozitivu oioin ne’ebé uza IA, inklui ókulu tradusaun nian no ferramenta triajen saúde nian ne’ebé kombina teknolojia IA ho aprosimasaun sira Medisina Tradisionál Xineza nian.

Dispozitivu triajen sira-ne’e utiliza indikadór sira hanesan karaterístika oin nian, kondisaun nanál nian, no pulsasaun, hamutuk ho sesaun pergunta no resposta nian, hodi hamosu koñesimentu saúde nian no fornese alerta antesipada sira kona-ba risku potensiál sira moras krónika nian.

Husi sentru AI ba ospitál

Hafoin haree aplikasaun AI oioin, delegasaun ne’e kontinua bá Sentru Kooperasaun Kuidadu Saúde Xina-ASEAN (Guangxi), ne’ebé bazeia iha Ospitál Afiliadu Dahuluk husi Universidade Medisina Guangxi.

Iha ne’ebá, jornalista sira observa diretamente oinsá teknolojia dijitál no IA implementa iha servisu kuidadu saúde nian, hahú husi ajuda ho triajen no diagnóstiku moras nian to’o konsulta pasiente nian.

Delegasaun ne’e mós vizita instalasaun sira CT scan nian no haree oinsá servisu médiku modernu sira integradu ho abordajen sira medisina tradisionál xinés nian.

Sentru Kooperasaun Saúde Xina-ASEAN (Guangxi) dezenvolve hanesan plataforma ida ba kooperasaun médiku internasionál entre Xina no nasaun sira ASEAN nian.

Sentru ne’e sei hahú operasaun iha Setembru 2025, ho luan maizumenus metru kuadradu 115.877 no ho kapasidade kama 838. Ninia fasilidade sira inklui sentru telemedisina, servisu médiku internasionál sira, sala operasaun moderna sira, no kapasidade sira ba kuidadu pasiente krítiku sira.

Aleinde servisu médiku sira, sentru ne’e apoia edukasaun no formasaun ba profisionál sira kuidadu saúde nian, peskiza, troka pesoál médiku sira, no dezenvolvimentu kooperasaun saúde Xina-ASEAN nian.

Diretór Servisu Médiku Internasionál, Zhang Lie, nota katak Universidade Médika Guangxi kontribui ba servisu médiku internasionál, tanba ninia estudante oioin ne’ebé mai husi nasaun oioin.

“Ami-nia universidade medisina nian iha estudante internasionál barak, no sira fó apoiu signifikativu ba ami-nia servisu médiku internasionál sira”, Zhang Lie atete ba delegasaun ida hosi journalista sira ASEAN nian.

Ospitál Afiliadu Dahuluk husi Universidade Médika Guangxi nian mós estabelese ona parseria sira ho ospitál oioin no instituisaun saúde sira iha nasaun sira ASEAN nian, hahú husi profisionál médiku sira husi ASEAN liu 1.500 maka partisipa ona iha programa formasaun oioin ne’ebé organiza husi instituisaun ne’e.

Programa ne’e abranje área oioin, inklui diagnóstiku jenétiku no prenatál tahalassemia, urolojia, intervensaun kardiovaskulár, teknolojia médiku, no kapasitasaun forsa traballu kuidadu saúde nian.

Timor-Leste mós partisipa ona iha enkuadramentu diálogu saúde Xina-ASEAN. Vise-Ministru Saúde Timor-Leste nian, José dos Reis Magno, tuir Fórum Kooperasaun Saúde Xina-ASEAN ba dalimak iha Nanning, iha Setembru 2025.

Sentru nia prezensa loke oportunidade ba nasaun sira ASEAN nian, inklui Timor-Leste, atu esplora kooperasaun liután iha área sira hanesan formasaun forsa traballu kuidadu saúde nian, telemedisina, peskiza, troka pesoál médiku sira, no dezenvolvimentu servisu kuidadu saúde nian ne’ebé bazeia ba teknolojia.

Vizita ba sentru AI no saúde nian halo parte iha ajenda loraik nian no loron ikus husi delegasaun mídia ASEAN nia vizita bá Guangxi, tuir série ida husi viajen sira iha kampu hodi observa dezenvolvimentu sira iha konetividade, komérsiu, indústria, no teknolojia, no mós kooperasaun Xina-ASEAN.

Notísia relevante: CAMEX prepara pavillaun Timor-Leste hodi promove produtu lokál iha merkadu Xina

Jornalista: Arminda Fonseca 

Editora: Maria Auxiliadora