PNDS iha Suku Sagadate implementa konstrusaun Kapeliña
BAUKAU, 18 Setembru 2026 (TATOLI)—Prosesu implementasaun atividade regulár konstrusaun kapeliña Programa Nasionál Dezenvolvimentu Suku (PNDS) iha Suku Sagadate sei iha faze konstrusaun.
Xefe Suku Sagadate, Postu Administrativu Laga, Aureliano de Jesus, esplika projetu PNDS iha Suku Sagadate ne’e sei fasilita komunidade aldeia lima kompostu husi Beliuali, Ia Sula, Naha-Afa, Auraba no Abuti, hodi hala’o vida espiritúal.
“Ami kalkula sei finaliza projetu ne’e iha fula-Novembru no sei inaugura ho misa agradesimentu,” Xefe Suku Sagadate informa iha Sentru Konvensaun Baukau (CCB-sigla portugeza), Vila Antiga,” Sesta ne’e.
Aureliano de Jesus relata projetu referidu atinje ona pursentu 55 hanesan faze hada bloku no iha tempu besik sei cor sinta leten iha-ne’ebé bazeia ba dezeñu sei konstrui ho medida luan metru neen no naruk metru 14 ne’ebé lokaliza iha Sentru Beliuali.
Orsamentu ba projetu ne’e hamutuk $33.047, iha-ne’ebé tuir loloos atu kanaliza bee-moos maibé ikusmai deside konstrui fali kapeliña.
Suku Sagadate hamutuk aldeia 11 kompostu husi Abuti, Alasafa, Auraba, Beliuali, Ia Sula, Naha-Afa, One-Bu’u, Samagata, Selegua, Sire-Bu’u, Ulabuti ho totál populasaun hamutuk 3.485 hosi xefe família 913.
Jornalista: Natalino Belo
Editór: Xisto Freitas da Piedade
