Progresu dezenvolvimentu bee-moos no eletrisidade iha Eraulo atinje 100%
ERMERA, 18 Setembru 2026 (TATOLI)—Administradór Interinu postu Letefoho, Joel Gomes informa katak progresu dezenvolvimentu infraestrutura iha Postu Letefoho liuliu iha Suku Eraulo, Munisípiu Ermera atinje 100%, tanba komunidade barak mak asesu ona ba bee-moos no eletrisidade.
Administradór Interinu Postu Letefoho, Joel Gomes, dehan komunidade ne’ebé asesu ona liña eletrisidade liuhusi programa eletrifikasaun komunitária (PEK) hamutuk uma kain 491.
“Totál uma kain ne’e mensiona kompostu husi Aldeia Olopana hamutuk uma kain 121, Aldeia Lequisalac hamutuk uma kain 67, Aldeia Taurema hamutuk uma kain 38, Aldeia
Eraulo Goulala iha uma kain 28, Aldeia Goulolo Goulala iha uma kain 94, Aldeia Eratoi hamutuk uma kain 64 no Aldeia Lakau hamutuk uma kain 79,” nia relata iha Eraulo, ohin.
Kona-ba asesu eletrisidade, nia dehan, sira-nia komunidade kuazé asesu 100% ona, balun ne’ebé seidauk tanba uma distánsia dook malu maibé apoiu solár panel ba sira hodi uza.
Maibe’ tuir nia, kona-ba fornesimentu bee moos nian daudaun ne’e komunidade asesu hela, balun asesu kanalizasaun públiku no balun privada (bee-moris),” nia dehan.
Nia hatutan, kona-ba estrada iha tinan 2026, Postu Administrativu Letefoho hetan oportunidade importante iha área infraestrutura estrada. Tanba sira simu no hein ho esperansa projetu Reabilitasaun Estrada Eraulo-Madede-Manama; Reabilitasaun Estrada Reapusa-Haheria; Reabilitasaun Estrada Ducurai-Letefoho; no Reabilitasaun Estrada Letefoho-Hatugau-Sauria.
“Obrigadu barak tanba imi rona povu nia lian, imi haree duni komunidade nia nesesidade no imi lori naroman ba Aldeia sira ne’ebé antes sei iha nakukun,” nia dehan.
Jornalista : Alexandra da Costa
Editór : Cancio Ximenes
