SEP kolleta ona ikan ne’ebé komunidade haki’ak iha Suku Builó
VIKEKE, 18 Setembru 2026 (TATOLI)—Sekretáriu Estadu Peska (SEP) liuhusi Servisu Ministériu Agrikultura, Peska, Pekuária no Floresta (SMAPPF) Munisípiu Vikeke kolleta ikan nila no ikan mas ne’ebé komunidade sira haki’ak iha Suku Builó, Postu Administrativu Ossú, Munisípiu Vikeke.
Xefe Departamentu Peska Munisípiu Vikeke, Bendito Trindade, esplika ikan nila no ikan mas ne’ebé foin lalais kolleta ne’e MAPPF apoia grupu sira hahú husi ke’e kolam no apoia ikan oan ba grupu sira iha suku Builó.
“Durante ne’e, ita mak fó apoia ba komunidade ne’ebé envolve iha grupu nune’e ita apoia ke’e kolam ba sira, fini ikan oan ba grupu hodi haki’ak ikan. Grupu haki’ak ikan Suku Builó ne’e hamutuk grupu 11 no ikan sira-ne’ebé grupu haki’ak boot hotu ona. Tan ne’e, ita kolabora hamutuk ho grupu sira hodi realiza kolleta tiha,” Xefe Departamentu Peska dehan ba TATOLI iha Postu Vikeke Vila, Sesta ne’e.
Bendito relata husi grupu 11 ida-ne’e SEP simbolikamente kolleta ona ikan nune’e bá-oin grupu sira iha Builó hahú fa’an sira-nia ikan ba konsumidór sira, atu grupu sira bele hetan rendimentu.
“Foin lalais ita kolleta ba grupu 11 nian hotu ho totál kolam hamutuk 45. Husi kolam sira-ne’e ita apoia ikan oan hamutuk 45.000 ba grupu haki’ak hahú iha fulan-Fevereiru 2026. Maibé, iha kolleta ne’e grupu ida mak reprezenta, ne’ebé Grupu Derulu mak reprezenta grupu sira-ne’e hotu. Husi grupu Derulu iha kolam hamutuk 8,” nia subliña.
Tuir Bendito rezultadu kolleta ikan sira-ne’ebé grupu sira haki’ak sei ajuda komunidade tanba bele hadi’a sira-nia ekonomia família no grupu sira kriativu tebes ba haki’ak ikan.
Xefe Grupu Derulu, Manuel Pinto haktuir, rezultadu kolleta ikan totál hamutuk kilógrama 114 kompostu husi ikan nila hamutuk kilógrama 71 no ikan mas hamutuk kilógrama 43 ne’ebé fa’an ona ba konsumidór sira iha Postu Ossú.
“Ami-nia kolam hamutuk sia (9). Kada kolam ho medida 20×10, maibé foin lalais kolleta ne’e foin kolam ida ho totál kilógrama 114. Ami fa’an ona ikan mas ne’ebé kada kilo ho presu $5 no ikan nila kilo ida ho presu $4. Osan sira husi kolleta dahuluk nian ami seidauk fahe ba malu. Ami hakarak ikan sira iha kolam ne’e fa’an hotu mak foin fahe no balun uza ba sosa ikan nia hahán. Daudaun ne’e ami sei iha ikan hamutuk kilógrama 1000 mak sei iha kolam laran. Ema sosa mós laiha. Ida-ne’e mak sai dezafiu ba ami, maibé ami nafatin iha kompromisu hodi haki’ak ikan,” nia haktuir.
Nia relata foufoun Grupu Derulu totál membru hamutuk na’in-lima (5), más tanba balun okupadu ba servisu seluk, entaun sira deside sai, nune’e agora daudaun membru grupu hela na’in-rua mak ativu hala’o atividade aguakultura.
Manuel informa iha kolleta dahuluk ne’e Sekretáriu Estadu Peska mak direta kolleta no hetan akompaña husi autoridade lokál no komunidade iha Postu Administrativu Ossú.
Jornalista: Vitorino Lopes da Costa
Editór: Xisto Freitas da Piedade
