Sidadaun xinés hadi’a hikas jardín públiku ne’ebé ne’e sobu iha Aimutin
DILI, 18 Setembru 2026 (TATOLI) – Sidadaun xinés ne’ebé antes ne’e sobu no estraga jardín públiku foun iha área Aimutin, Dili, hodi fasilita asesu ba sira-nia loja, hadi’a fila fali jardín ne’e tuir orientasaun husi Sekretariadu Estadu Asuntu Toponímia no Organizasaun Urbana (SEATOU).
Sekretáriu Estadu Asuntu Toponímia no Organizasaun Urbana, Germano Santa Brites Dias, esplika parte ne’ebé responsavel ba destruisaun fasilidade públika ne’e simu ona orientasaun atu restaura jardín ba nia kondisaun orijinál molok kontinua atividade konstrusaun sira seluk.
“Depois de ita identifika violasaun ne’e, ami fó orientasaun no medida tuir lei. Agora sira hahú ona hadi’a fila-fali jardín ne’ebé sira sobu. Ida-ne’e importante atu patrimóniu públiku ne’ebé konstrui ho osan Estadu bele fila ba nia forma orijinal,” Germano ko’alia iha Kolmera, Dili.
SEATOU antes ne’e kondena maka’as asaun ajénsia no sidadaun estranjeiru ne’ebé sobu parte husi jardÍ públiku atu halo dalan asesu ba loja, tanba asaun ne’e viola regra ordenamentu urbana no estraga patrimóniu públiku.
Nune’e, SEATOU servisu hamutuk ho Polísia Nasionál Timor-Leste (PNTL) konvoka parte envolvida sira atu presta informasaun no klarifika sira-nia responsabilidade ba destruisaun fasilidade públika ne’e.
Sekretáriu Estadu Germano fundamenta, autoridade relevante sei kontinua akompaña prosesu restaurasaun no sei aplika medida administrativa tuir regulamentu ne’ebé vigora, inklui multa no kontrolu ba atividade konstrusaun sira ne’ebé la tuir regra.
Nia mos apela ba sidadaun hotu-hotu, inklui empreza no investidór estranjeiru sira, atu respeita ordenamentu urbana no proteje patrimóniu públiku ne’ebé eziste ba benefísiu komunidade tomak.
“Fasilidade públika hanesan jardín, paseiu no espasu verde sira ne’e patrimóniu povu nian. Tan ne’e, ema hotu-hotu tenke kontribui atu kuidadu no prezerva fasilidade hirak-ne’e hodi mantein ambiente urbana ne’ebé organizadu no hafurak sidade Dili,” nia konklui.
Jornalista: Camilio de Sousa
Editór: Evaristo Soares Martins
