SEKOMS lansa plataforma Suku Dijitál iha Uma Ana-Ulu Venilale
VENILALE, 19 Setembru 2026 (TATOLI)- Governu liuhusi Sekretáriu Estadu Komunikasaun Sosiál (SEKOMS), ohin, lansa Plataforma Suku Dijitál Sentru Informasaun Suku uma Ana Ulu, postu Administrativu Venilale, Munisípiu Baukau.
Sekretáriu Estadu Komunikasaun Sosiál, Expedito Loro Dias Ximenes, hateten Plataforma Suku Dijitál importante tebes atu fasilita komunidade uma Ana-Ulu hodi asesu informasaun sira liga ho dezenvolvimentu suku ne’ebé lao hela nune’e mos atividade sira iha suku nian.
“Ohin, mai lansa suku dijitál iha fatin ida-ne’e, suku uma Ana-Ulu, suku dijitál ne’e molok lansa SEKOMS fó ona formasaun ba juventude iha ne’e hanesan mós lansa iha suku seluk tanba IX governu konstitusionál nia.
Programa ida mak oinsá desimina informasaun Governu nian ba territóriu Timor-Leste ida mak servisu hamutuk ho Ministériu Administrasaun Estatál no Ministériu transporte telekomunikasaun lansa suku dijitál atu suku mós hetan asesu ba informasaun liuhusi internet (Starlink) ne’ebé MAE no MTK tau iha suku hothotu,” hateten Expedito Loro Dias, iha ámbitu lansamentu suku dijitál iha Uma Ana-Ulu.
Sentru Informasaun ho objetivu tenke iha internet no iha plataforma komunidade bele asesu informasaun sira akontese nivel nasionál to’o iha suku laran.
Governante ne’e dehan lansamentu ba Sentru Informasaun Suku ne’e hanesan pasu ida husi polítika Governu Dasiak nian. Aleinde progresu nasaun la’o iha setór hototu, maibé sei iha lakuna ka frakeza, nune’e ho lansamentu sentru informasaun atu responde lakuna ba iha área teknolojia informasaun no komunikasaun nian iha suku sira.
SEKOMS sei instala sentru informasaun iha suku 100 no daudaun halo ona ba suku 50 iha munisípiu difente iha Territóriu nasionál.
“Alende suku dijitál sei fortifika liu tan Rádio Komunidade tanba Rádio Komunidade mak liña frente informasaun ba Suku sira”, Hateten Expedito.
Iha fatin hanesan, Administradór Postu Administrativu Venilale, José Freitas Boavida, agradese ba Governu liu husi SEKOMS tanba liu husi programa ne’e bele ona ajuda suku hodi fahe informasaun ba komunidade sira liuhusi plataforma dijitál suku nian.
“Ha’u nia agradesimentu ba Governu liuliu misaun ida ne’ebé hakbesik informasaun ba komunidade tanba iha Venilale, suku uma Ana-Ulu hanesan suku dahuluk ne’ebé hetan lansamentu suku dijitál iha pasu foun ida oinsá hatudu suku nia atividade liuhusi plataforma dijital liuhusi informasaun sira ne’ebé fahe”, hateten Administradór Venilale ne’e.
Plataforma dijitál ne’ebé iha ba oin informasaun hothotu liga ho dezenvolvimentu suku nian sei publika liu husi plataforma ne’ebé iha ona.
SEKOMS liu husi ekipa tékniku sira halo ona formasaun ba juventude nain neen iha suku referidu hodi halao jestaun ba plataforma dijitál suku referidu iha biban ne’e atribui mós sertifikadu ba formadu sira.
Jornalista: Anito Soares
Editór: Florencio Miranda Ximenes
