Bankada CNRT aprezenta kandidatu na’in-rua ba komisáriu CNE
DILI, 21 Setembru 2026 (TATOLI)-Bankada husi Partidu Kongresu Nasionál Rekonstrusaun Timorense (CNRT, sigla portugés) submete ona lista kandidatu na’in-rua ba komisáriu Komisaun Nasionál Eleisaun (CNE) ba iha meza Parlamentu Nasionál.
Xefe Bankada CNRT, Patrocínio dos Reis Fernandes, hateten bankada seidauk bele fó sai naran kandidatu sira-nian, maibé sira iha méritu, esperiénsia no profisionál relevante ho natureza serbisu instituisaun hanesan órgaun eleitorál.
Aleinde ne’e, komisáriu sira ba CNE nu’udar órgaun eleitorál tenke serbisu ho independente, integridade no responsabilidade.
“Ita hein katak, iha Setembru nia laran prosesu sira bele termina, komisaun bele funsiona ho di’ak ho estrutura no mandatu foun hodi tau matan ba eleisaun sira mai”, nia hatete.
Lembra katak, Prezidente CNE, José Agostinho Belo, ho nia kompozisaun atuál ninia mandatu ramata iha 16 Agostu ne’e.
Tuir Lei númeru 7/2026, 29 Maiu, alterasaun dahaat husi Lei númeru 5/2006, 28 Dezembru, Órgaun Administrasaun Eleitorál, reprezentasaun husi Parlamentu Nasionál iha membru na’in-tolu ba CNE, ho mandatu tinan lima, renovavel. No órgaun lejizlativa ne’e mak sei hili Prezidente CNE liuhusi eleisaun ba kandidatu sira ne’ebé bankada parlamentár sira aprezenta.
Deputadu ne’e salienta katak tuir rejimentu, fó oportunidade ba bankada parlamentár sira hotu atu aprezenta kandidatu maibé votu maioria mak determina. “No ita-nia sistema opta proporsionalidade, entaun kandidatu ida fó ba bankada sira seluk atu baprezenta”, dehan.
Xefe bankada Partidu Demokrátiku (PD), Manuel Henrique Noronha, seidauk bele fó komentáriu ba aprezentasaun kandidatu husi bankada nia, tanba ne’e desizaun mai husi partidu no aban sei halo komunikasaun uluk ho bankada CNRT.
Prezidente Parlamentu Nasionál, Maria Fernanda Lay, admite katak simu ona lista kandidatu husi bankada CNRT.
Iha semana kotuk meza fó sai ona ba bankada sira atu aprezenta kandidatu ho prazu loron sanulu hafoin prosede ba eleisaun iha plenária.
Notísia relevante: http://Meza Parlamentu husu bankada parlamentár atu aprezenta kandidatu ba komisáriu CNE –
Jornalista: Nelson de Sousa
Editora: Maria Auxiliadora
