Governu halo despeju administrativu ba uma-kain 29 iha área Canossa to’o Manleuana

DILI, 21 Setembru 2026 (TATOLI) – Governu liuhusi ekipa konjunta husi Sekretaria Estadu Asuntu Toponímia no Organizasaun Urbana (SEATOU) no Ministériu Obras Públikas (MOP), iha Segunda ne’e, halo despeju administrativu ba uma-kain 29 ne’ebé hela iha área husi eskola Canossa Has-Laran to’o rate ain Manleuana, Postu Administrativu Dom Aleixo, Munisípiu Dili.

Sekretáriu Estadu Asuntu Toponímia no Organizasaun Urbana, Germano Santa Brites Dias, hateten katak medida ne’e realiza hanesan parte husi kontinuasaun projetu alargamentu estrada ne’ebé atualmente la’o hela.

Nia dehan, Governu remata ona faze alargamentu estrada husi Delta, Elemloy to’o eskola Canossa, no agora sei kontinua obra husi eskola Canossa to’o rate-ain Manleuana.

“Projetu ida-ne’e hanesan alargamentu estrada husi Canossa to’o rate-ain Manleuana. Tan ne’e, ohin ami mai halo despeju administrativu ba uma-kain 29 ne’ebé afetadu husi projetu ne’e. Ami husu komunidade afetada sira atu kolabora ho Governu hodi fasilita implementasaun projetu ba dezenvolvimentu nasionál,” dehan Germano ba jornalista sira iha Manleuana, Dili.

Nia esplika, maioria komunidade afetada sira simu ona projetu alargamentu estrada ne’e no prontu atu kompleta prosesu administrativu ne’ebé presiza antes simu kompensasaun.

“Daudaun ne’e uma-kain hamutuk 14 ka 15 mak kompleta ona dokumentu hotu iha MOP. Restu sei kontinua kompleta dokumentus durante semana ida ne’e,” Germano subliña.

Germano akresenta dokumentu ne’ebé presiza inklui kartaun eleitoral, númeru konta bankária no asinatura iha termu aseitasaun atu Governu bele prosesu pagamentu kompensasaun ba benefisiáriu sira.

“Ita espera katak durante semana ida-ne’e afetadu sira bele kompleta hotu dokumentu hanesan kartaun eleitoral, konta bankária no asina termu aseitasaun, nune’e Governu bele aselera pagamentu ba sira-nia direitu,” dehan nia.

Manuel dos Santos reprezentante ba uma kain 29 informa katak, nia parte prontu  kolabora ho Governu  maibe tanke indemniza tanba uma ne’e halo husi nia osan rasik.

“Ami hotu aseita atu halo alargamentu estrada iha ami-nia bairru maibé tenke selu indemnizasaun atu nune’e ami bele  ba buka fatin seluk ,’’ nia konklui.

Projetu alargamentu estrada ne’e espera bele melhora asesu transporte no mobilidade ba komunidade sira iha área Manleuana no zona sira seluk iha kapital Dili, nomós apoia dezenvolvimentu infraestrutura urbana ne’ebé Governu konsidera importante ba kresimentu ekonomia no servisu públiku sira.

Governu seidauk sobu fatin fa’an roupa obralan iha Pantai Kelapa

Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, fó-sai katak seidauk bele halo asaun hodi sobu fatin faan roupa obralan sira iha área Pantai Kelapa, Dili, tanba fatin ne’ebé negosiante sira uza atu hala’o sira-nia atividade komersiál pertense ba rai privadu.

Germano dehan, maske atividade fa’an roupa obralan iha área referidu la’o iha fatin ida ne’ebé konsidera la organiza ho di’ak no afeta aspetu estétika urbana, Governu presiza respeita nafatin direitu propriedade privadu tuir lei no regulamentu ne’ebé vigora iha país ne’e.

“Governu labele sobu tanba rai ne’ebé negosiante sira uza hodi fa’an roupa obralan pertense ba rai privadu. Ami bele halo intervensaun wainhira proprietáriu rai ka entidade kompetente haruka no fó autorizasaun,” Germano hateten.

Fatin fa’an roupa obralan refere lokaliza iha estrada ibun besik rezidénsia Madre Alma, Pantai Kelapa, no durante ne’e atrai konsumidór barak husi kapital no área sira seluk. Maibé, prezensa negósiu sira ne’e mos lori preokupasaun balu husi komunidade kona-ba organizasaun espasu, limpeza no imajen urbana iha área referidu.

Germano esplika katak kompeténsia SEATOU liu-liu mak organiza no hadi’a aspetu urbana iha espasu públiku. Nune’e, bainhira atividade komersiál sira hala’o iha rai privadu, Governu tenke hala’o koordinasaun ho proprietáriu rai antes foti kualkér medida.

Nia akresenta, SEATOU kontinua halo sensibilizasaun ba negosiante sira atu mantén limpeza no orden iha fatin ne’ebé sira uza hodi hala’o negosiu, atu la kria problema ba utilizadór estrada ka komunidade sira ne’ebé hela iha área ne’e.

“Maski fatin ne’e iha rai privadu, ami nafatin hakarak atu área ne’e organiza ho di’ak no seguru ba ema hotu. Tanba ne’e, ami kontinua ko’alia ho parte relevante sira atu buka solusaun ne’ebé di’ak ba ema hotu,” nia dehan.

To’o agora, Governu seidauk simu instrusaun ka pedidu ofisiál husi proprietáriu rai kona-ba nesesidade atu hasai ka sobu estrutura sira ne’ebé uza ba atividade faan roupa obralan iha Pantai Kelapa.

Jornalista: Camilio de Sousa

Editór: Evaristo Soares Martins