SEATOU autoriza negosiante fa’an iha jardín públiku husi tuku 7 kalan ba leten
DILI, 21 Setembru 2026 (TATOLI) – Sekretáriu Estadu Asuntu Toponímia no Organizasaun Urbana (SEATOU), Germano Santa Brites Dias, hateten, Governu kontinua autoriza negosiante sira atu fa’an hahan, kafé no produtu seluk iha jardín públiku sira husi tuku 7 kalan ba leten, maibé tenke mantein limpeza no garante saúde públika.
Germano ko’alia ba jornalista sira iha Manleuana, Dili, iha segunda-feira ne’e, dehan katak atividade komérsiu iha jardín públiku bele ajuda komunidade no negosiante sira hetan rendimentu, maibé tenke akompaña ho responsabilidade atu tau matan ba ambiente no ijiene.
“Ita autoriza maluk negosiante sira bele fa’an sira-nia produtu iha jardín sira komesa husi tuku 7 kalan ba leten, maibé tenke hamoos tuituir hodi mantein saúde públika,” dehan Germano.
SEATOU sei kontinua monitoriza atividade komérsiu iha área públika sira tanba durante ne’e, ekipa observa katak negosiante balu seidauk halo jestaun lixu ho didi’ak, liuliu iha jardín Motael.
Nia dehan, iha okaziaun balu negosiante sira la tau lixu iha fatin apropriadu, maibé soe fali ba tasi laran, ne’ebé kontribui ba poluisaun ambientál no estraga beleza tasi-ibun.
“Dala barak ami haree katak lixu sira ne’ebé soe ba tasi laran mai bou hamutuk iha tasi-ibun bainhira udan boot. Situasaun ida-ne’e la’ós deit estraga ambiente, maibé mós bele afeta saúde públika,” nia hateten.
Germano husu ba negosiante hotu-hotu ne’ebé hala’o atividade komérsiu iha jardín públiku sira, inklui Jardín Motael, atu hamos no soe aqua mamuk, plástiku no lixu seluk ba fatin rekolla lixu ne’ebé prepara ona husi autoridade kompetente molok fila ba uma.
Nia aviza, karik iha negosiante sira ne’ebé kontinua soe lixu arbiru ka la kumpre regra limpeza ne’ebé determina ona, SEATOU sei foti medida rigorozu tuir lei no regulamentu ne’ebé vigora.
SEATOU espera katak kolaborasaun entre negosiante, komunidade no Governu bele ajuda prezerva jardín públiku sira hanesan fatin desportu, rekreasaun no atividade ekonomia ne’ebé saudável no organizadu ba ema hotu.
Jornalista : Camilio de Sousa
Editór: Evaristo Soares Martins
