Governu husu empregadór Xineza atu labele konstrui edifísiu iha trotoar leten

DILI, 22 Setembru 2026 (TATOLI)—Governu liuhusi Ministru Obra Públika, Samuel Marçal, husu ba empregadór Xineza sira atu labele konstrui edifísiu iha trotoar leten no tenke estabelese estasionamentu ba viatura sira, tanba Dili sai kapitál la’ós atu estraga ninia paisajen.

Kestaun kona-ba sobu loja Xineza ida iha área Aumutin ne’e nia mós rona tanba ne’e mak nia sei bolu fali dirijente sira atu haree lolos no identifika fatin ne’ebé mak ema bele halo negósiu no fatin ne’ebé mak proibidu (bandu).

“Maibé ha’u hatene katak ifa fatin balun sira hetan autorizasaun tiha ona antes Governasaun ida-ne’e. Entaun la’ós de’it tanba MOP maibé mós parte Terras Propriedade,” Ministru Samuel relata ba jornalista iha nia kna’ar fatin, ohin.

Governante ne’e dehan, nia ho SEATOU inklui entidade sira seluk sei kria reuniaun ida atu haree didi’ak, nune’e bele jere sidade ne’e halo di’ak tanba Dili sai kapitál no sé Dili mak nune’e ona entaun sei la atrai investidór no vizitante sira.

“Ne’ebé, bainhira ita hakarak atrai ema seluk mai vizita ita-nia rain, ita tenke kria kondisaun di’ak atu akomodasaun sira bele funsiona, kria empregu ba joven sira, produtu lokál bele folin, entaun diversifikasaun ekonomia moris tama to’o baze,” nia dehan.

Tanba ne’e, nia husu ba entidade hotu tenke dezenvolve sidade Dili, kria ambiente ne’ebé di’ak atu fatin ne’e bele sai alvu ba turizmu no ekonómia, se lae lori osan ba investe hotu iha rai-li’ur (Bali).

“Enkuantu bainhira sidadaun Xineza sira halo loja iha fatin bandu sira hanesan iha trotoar leten, MOP sei koordena ho SEATOU hodi rezolve asuntu urbanizmu nian,” nia hateten.

Enkuantu, bazeia ba observasaun jornalista Tatoli nia iha terrenu hatudu katan konstrusaun ne’e paradu hela no razaun sobu tanba empregadór konstrui rabat kedas ho trotoar no jardin Aimutin, aleinde ne’e laiha estasionamentu ba viatura sira.

Jornalista : Alexandra da Costa

Editór       : Cancio Ximenes