Komisáriu EDTL promete aldeia tolu iha Uailalika sei asesu enerjia eletrisidade iha 2027
VIKEKE, 22 Setembru 2026 (TATOLI)—Komisáriu Ezekutivu Servisu Korporativu Eletrisidade de Timor Leste, Empreza Públika (EDTL, E.P.), Júlio de Jesus Gonçalves, promete 2027 populasaun aldeia tolu iha área Uailalika sei asesu enerjia eletrisidade.
“Kona-ba preokupasaun komunidade aldeia tolu husi Suku Uaitame ne’ebé hela iha área Uailalika ne’ebé durante tinan barak seidauk asesu eletrisidade, ha’u promote iha tinan oin (2027) ha’u mak sei inagura eletrisidade ba aldeia tolu iha Suku Uaitame nian, tanba daudaun ne’e prosesu aprovizionamentu ita prosesa ona,” Júlio de Jesus Gonçalves ba jornalista sira hafoin ramata diálogu ho komunidade iha Uailalika, Tersa ne’e.
Nia haktuir aldeia sia (9) iha Postu Uatulari mak seidauk asesu ba enerjia eletrisidade inklui komunidade Suku Uaitame ne’ebé hela iha área Uailalika hanesan Aldeia Makadike, Foho Manu no Uma-Ki’ik.
“Tanba ne’e, ha’u husu ba autoridade lokál no komunidade bainhira ami hetan ona empreza implementadór ba projetu eletrifikasuan nian labele mosu impedementu. Kuandu mosu impedementu ami sei muda,” nia hato’o.
Iha fatin hanesan, Xefe Suku Uaitame, Marcelino Alves Pinto, hato’o agradesimentu ba Komisáriu EDTL ho ekipa ne’ebé diretamente mai haree komunidade Uaitame iha Uailalika sira-nia preokupasaun ne’ebé durante tinan barak la asesu enerjia eletrisidade.
Jornalista: Vitorino Lopes da Costa
Editór: Xisto Freitas da Piedade
