Parlamentu aprova proposta Lei Propriedade Industriál ho unanimidade
DILI, 22 Setembru 2026 (TATOLI)-Parlamentu Nasionál liuhusi reuniaun plenária tersa-feira ne’e, aprova proposta lei númeru 18/VI(2a) kona-ba Kódigu Propriedade Industriál iha finál globál ho votu a favór 49, kontra no abstensaun 0.
“Pasa ho unanimidade, husu Komisaun D [ba Asuntu Ekonomia no Dezenvolvimentu] halo redasaun finál hodi haruka ba Prezidente Repúblika halo promulgasaun”, Prezidente Parlamentu Nasionál, Maria Fernanda Lay, hato’o iha sala plenária Parlamentu, ohin.
Objetivu husi kriasaun Kódigu Propriedade Industriál hanesan rekizitu ida iha ámbitu adezaun Timor-Leste ba Organizasaun Mundiál Komérsiu (OMK) no integrasaun ba Asosiasaun Nasaun Sudeste Aziátiku (ASEAN, sigla inglés).
Prosesu sira-ne’e ezije kumprimentu ba akordu OMK nian kona-ba aspeitu Direitu Propriedade Intelektuál relasiona ho Komérsiu (TRIPS) no armonizasaun ho dispozisaun sira husi konvensaun internasionál sira ne’ebé regula husi Organizasaun Mundiál ba Propriedade Intelektuál.
Kódigu Propriedade Industriál iha artigu 282, ne’ebé inspira husi direitu komparadu no kompromisu internasionál sira ne’ebé Timor-Leste asume ona no hanoin kona-ba kestaun hotu ne’ebé relasiona ho propriedade industriál, ne’ebé fasilita kompriensaun no uza husi ema hotu iha sira-nia atividade sientífika, kreativu no ekonómika, presiza atu uza kódigu ne’e.
Notísia relvante: https://tatoli.tl/2026/06/15/parlamentu-aprova-proposta-lei-kodigu-propriedade-industrial/
Jornalista: Nelson de Sousa
Editora: Maria Auxiliadora
