Afeta dezastre naturál, APC sei muda família na’in-57 iha Ila ba bairru foun
KOVALIMA, 23 Setembru 2026 (TATOLI) – Prezidente Autoridade Protesaun Sivíl (APC), Jesuino dos Reis Matos Carvalho, akompañadu husi Komandante APC Munisípiu Kovalima, Celestino Afonso, no korpu bombeiru, vizita diretamente fatin ne’ebé afetadu husi dezastre naturál iha Aldeia Ila, Suku Belekasak, Postu Administrativu Maucatar, Munisípiu Kovalima.
Vizita ne’e hala’o atu observa kondisaun komunidade afetada husi dezastre naturál, liuliu erosaun, no avalia nesesidade atu loke estrada ba asesu komunidade nian ba bairru foun, iha ámbitu preparasaun ba komemorasaun Loron Mundiál Dezastre Naturál.
“Vizita ne’e atu haree diretamente apoiu husi IGE ba hadi’a estrada ba komunidade vítima dezastre naturál, tanba material konstrusaun prepara ona. Ami mós mai ko’alia ho komunidade kona-ba bairru foun, tanba área ne’ebé sira hela iha risku ba dezastre naturál, no komunidade sira aseita ona atu muda ba bairru foun,” Prezidente APC, Jesuino dos Reis Matos Carvalho, hato’o ba jornalista sira hafoin vizita fatin afetadu iha Aldeia Ila.
Tuir dadus APC, família na’in-57 ne’ebé sai vítima dezastre naturál, liuliu erosaun, sei muda ba bairru foun. APC sei halo verifikasaun ba família sira ne’e, no sei haruka loke estrada atu fasilita asesu komunidade nian ba área refere.
Governu, liuhosi entidade kompetente, prepara ona apoiu material ba komunidade afetada. Maibé, loke estrada sei depende ba apoiu no koordenasaun ho IGE, atu garante komunidade sira bele asesu ba bairru foun.
Iha sorin seluk, Administradór Postu Administrativu Maucatar, Laurentino de Jesus, hateten katak nia mós submete ona pedidu ba Prezidente Autoridade Munisípiu Kovalima kona-ba loke estrada, maibé to’o agora seidauk hetan rezultadu.
Nia haktuir katak disponibilidade material konstrusaun ne’ebé sei rai hela iha fatin ne’e sai preokupasaun, tanba komunidade vítima dezastre naturál presiza asesu estrada atu bele muda ba bairru foun no hahú harii fali sira-nia uma ne’ebé hetan estragu.
Aleinde ne’e, APC sei komemora Loron Mundiál Dezastre Naturál iha 13 Outubru 2026, iha Aldeia Ila, Suku Belekasak, Postu Administrativu Maucatar, Munisípiu Kovalima.
Atividade komemorativa ne’e sei inklui animasaun ba vítima dezastre naturál, konkursu ba estudante sira, edukasaun no simulasaun kona-ba medida atu komunidade bele sai husi área afetada husi dezastre naturál, dada tali ba joven sira, no animasaun seluk.
Komemorasaun ne’e mós sai oportunidade atu hasa’e konsiénsia komunidade nian kona-ba prevensaun no preparasaun hasoru dezastre naturál.
Jornalista:Celestina Teles
Editor:Florencio Miranda Ximenes
