CNE hala’o edukasaun sivika kona-ba lala’ok eleisaun iha Fatululik
KOVALIMA, 23 Setembru 2026 (TATOLI) – Komisaun Nasionál ba Eleisaun (CNE-sigla Portugés ) kontinua hala’o edukasaun sivika ba komunidade, liuhosi atividade sensibilizasaun kona-ba demokrasia no sistema eleisaun, ne’ebé hala’o iha Postu Administrativu Fatululik, Munisípiu Kovalima.
Diretora CNE Munisípiu Kovalima, Margarida dos Santos, esplika ba komunidade kona-ba konseitu demokrasia, prinsipiu eleisaun no importánsia partisipasaun povu nian iha prosesu hili reprezentante sira iha TL.
“Demokrasia mai husi liafuan Gregu demos, ne’ebé signifika povu, no cratos, ne’ebé signifika ukun. Nune’e, demokrasia hatudu katak soberania no podér atu ukun iha liman povu nian”, Diretora CNE Kovalima, Margarida dos Santos, hato’o iha Fatululik.
Margarida dos Santos mós esplika katak Timor-Leste adota sistema Estadu Direitu Demokrátiku, ne’ebé bazeia ba Konstituisaun RDTL no lei sira ne’ebé vigora iha nasaun TL .
Nia enfatiza katak iha sistema demokrátiku, povu iha direitu atu hili lideransa no reprezentante sira liuhosi eleisaun universál, livre, segredu no periódiku.
Nia hatutan katak prinsipiu separasaun podér sai parte importante husi sistema demokrátiku, atu garante fahe responsabilidade no podér entre órgaun soberanu sira tuir Konstituisaun.
Timor-Leste hala’o ona eleisaun prezidensiál iha tinan 2002, 2007, 2012, 2017 no 2022. Enkuantu eleisaun parlamentár realiza iha tinan 2001, 2007, 2012, 2017, 2018 no 2023.
Aleinde ne’e, eleisaun ba xefe suku realiza ona dala haat, iha tinan 2004, 2009, 2016 no 2023, enkuantu eleisaun munisipál seidauk realiza.
Antes ne’e, CNE mós hala’o ona atividade edukasaun sivika ba estudante sira iha nivel ensinu sekundáriu, iha nivél Munisípiu Kovalima, Postu Administrativu Fohorem no Postu Administrativu Fatululik.
Liuhosi atividade sensibilizasaun ne’e, CNE hakarak hasa’e koñesimentu komunidade nian kona-ba demokrasia, sistema eleisaun no direitu siviku, atu komunidade komprende di’ak liután nia papél iha prosesu demokrátiku.
Administradór Postu Administrativu Fatululik ,Munisipiu Kovalima, Felix Vicente , reforsa katak,sensibiliza informasaun kona-ba lalaok eleisaun ne’e importante oinsá atu hasa’e komunidade sira-nia koñesmentu.
“ Programa edukasaun sivika ne’e importante oinsá atu hasa’e komunidade sira-nia koñesementu konaba lalaok eleisaun iha Timor-Leste (TL) “nia dehan.
Jornalista: Celestina Teles
Editór: Florencio Miranda Ximenes
