Kompañia CTT klarifika presu simentu CONCH $4,20 ne’e la’os pertmannete
DILI, 23 Setembru 2026 (TATOLI)—Kompañia Cement Timor Trading, SA, klarifika katak presu atuál simentu ho marka “CONCH” $4.20 ne’e la’ós fixu ka permanente maibé sei mudansa bazeia ba situasaun iha merkadu globál.
Tanba ne’e, tuir Jerente Marketing Cement Timor Trading SA, Ligia Tilman, hateten kompañia Cement Timor Trading, SA, hanesan kompañia nasionál ne’ebé investe iha embalajen simentu ho marka “CONCH” iha Timor-Leste.
“Produtu ne’e sira importa husi nasaun estranjeiru ne’ebé fábrika iha SDIC Indonézia, Papua Cement Co. Ltd, nomós husi China Anhui Conch Group (Conch), no ami-nia Distribuidór Ofisiál maka loja Central Hardware Trade Lda, ne’ebé lokaliza iha área Jacinto Candido-Dili,” Jerente ne’e relata ba Agência Tatoli liuhusi telefónika, ohin.
Nia mós informa, totál estoké simentu CONCH ne’ebé sira prepara ba fulan-Setembru 2026 hamutuk tonelada 26.000, tanba ne’e sira nafatin garante disponibilidade estoke simentu CONCH atu evita falta estoke iha merkadu no sei kontinua atende nesesidade ba kliente sira.
Nia hatutan, simentu CONCH daudaun ne’e saku ida ho folin $4.20, folin antes $3.90, simentu jumbo saku tonelada ida iha saku 25 no ninia folin $105.00, folin antes $97.50, enkuantu Jumbo U’ut ne’e tonelada ida folin $105.00 no folin antes $102.50.
“Kona-ba folin atuál ne’e konsidera kustu operasionál no transporte ne’ebé afetadu husi mudansa folin mina iha merkadu globál no internasionál. Nune’e presu ne’e la’ós permanente ka fixu, tanba folin bele muda tuir evolusaun presu mina iha merkadu global,” nia dehan.
Nia mós relata tan katak sira-nia kompañia aleinde faan simentu maibé sira mós halo atendimentu kona-ba material konstrusaun, fábrika batako, kontraktór internasionál inklui nasionál iha Dili no munisípiu sira.
“Tanba ne’e husu nafatin ba kliente sira atu kontinua apoiu no tau konfiansa ba simentu CONCH, tanba simente ne’e iha kualidade no forsa ba futuru iha Timor-Leste,” nia dehan.
Jornalista : Alexandra da Costa
Editór : Cancio Ximenes
