Komunidade uma-kain 11 iha área Kontak Dame Larigutu asesu ona bee-moos
VIKEKE, 23 Setembru 2026 (TATOLI)—Abitante husi Aldeia Uairuai, Suku Ossu de Cima, Postu Administrativu Ossú, Munisípiu Vikeke, Hermelinda Monteiro da Cruz, informa daudaun ne’e komunidade uma-kain 11 ne’ebé hela iha área Kontak Dame Larigutu asesu ona bee-moos.
“Ami hela iha-ne’e uluk enfrenta liubá bee-moos. Kada uma-kain idaidak tenke ba ke’e bee-matan rasik mak hafoin bele kuru bee ba konsume. Depoiz ami la’o ho distánsia kuaze metru 600-resin, ida-ne’e sai sofrimentu ida-ne’ebé durante tinan barak ami hasoru. Ami sente terus liubá bee-moos, nune’e iha tinan 2025 ajénsia Adventist Development and Relief Agency (ADRA) mak mai apoia ami hodi ajuda dada bee-moos ba ami. Ne’ebé, agora ami la la’o dook ona hodi kuru bee. Kuru bee iha kedas uma-oin,” Hermelinda Monteiro da Cruz ba jornalista sira iha Ossú de Cima, Kuarta ne’e.
Nia esplika bee ne’e ho débitu litru haat pur-segundu, ADRA mós konstrui tanke rua no dada ba komunidade.
“Ami mós uza bee ba atividade agrikultura hanesan rega modo hodi lori bá fa’an iha merkadu aumenta ami-nia nesesidade uma-laran. Kona-ba orsamentu ba konstrusaun, ADRA mak jere no ami komunidade ladún hatene ba gastu sira,” Hermelinda subliña.
“Foufoun dada bee ne’e ami uma-kain sia (9) de’it mak asesu, maibé iha tinan ida-ne’e aumenta tan uma-ka’in rua (2) ne’ebé agora asesu ba bee-moos ne’e hamutuk uma-kain 11. Husi uma-kain sira-ne’e ami fahe stop kran tolu. Stop kran primeiru uma-kain ruma mak asesu. Ba daruak uma-kain neen (6) no stop kran ikus uma-kain tolu mak asesu,” nia haktuir.
Tuir dadus, populasaun Ossú de Cima hela iha área Kontak Dame totál abitante hamutuk na’in-38 husi uma-kain-11.
Jornalista: Vitorino Lopes da Costa
Editór: Xisto Freitas da Piedade
