SEATOU husu sidadaun koordena ho autoridade molok harii uma besik estrada
DÍLI, 23 Setembru 2026 (TATOLI) – Sekretáriu Estadu Asuntu Toponímia (SEATOU), Germano Santa Brites, husu ba sidadaun sira ne’ebé planeia atu harii uma besik estrada atu informa no halo koordenasaun ho autoridade no SEATOU molok hahú konstrusaun.
Germano hateten katak informasaun no koordenasaun ne’e importante atu garante katak konstrusaun la afeta liña estrada no espasu públiku.
“Sidadaun ne’ebé hakarak harii uma besik estrada tenke informa uluk ba SEATOU molok hahú konstrusaun,” Germano hateten ba jornalista sira iha Colmera, Dili, Kuarta ne’e
Nia esplika katak iha kazu balu sidadaun sira hahú harii uma laiha koordenasaun ho entidade kompetente. Ida ne’e bele halo konstrusaun la tuir regra ka lokalizasaun ne’ebé determina, nune’e ikusmai proprietáriu tenke sobu ka hasai no sbobu konstrusaun ne’e.
Tanba ne’e, SEATOU rekomenda ba sidadaun hotu-hotu atu halo koordenasaun ho SEATOU no Ministériu Obras Públikas (MOP) molok hahú konstrusaun, liuliu ba uma ka edifísiu sira ne’ebé sei harii besik estrada.
Germano hateten katak medida ne’e importante atu evita prejuízu ba sidadaun sira no prevene problema legál ka konstrusaun iha futuru.
Jornalista: Camilio de Sousa
Editór: Filomeno Martins
