Abitante Uhacae konsume bee-mota
VIKEKE, 24 Setembru 2026 (TATOLI)—Abitante husi Aldeia Uachae, Suku Uma-Ua’in Kraik, Postu Administrativu Vikeke Vila, Munisípiu Vikeke, Merita da Costa Soares, hateten daudaun ne’e populasaun Uhacae iha área Uetali maioria asesu bee-mota ho distánsia kilómetru ida-resin.
“Kona-ba bee-moos ami agora depende kuru bee iha mota Uetali hodi konsume ho distánsia besik kilómetru ida. Maski ho distánsia ne’ebé dook, maibé ami tenke bá hodi kuru bee. Se ita la bá kuru iha mota, entaun ita labele uza ba nesesidade lorloron,” Merita ba TATOLI iha Aldeia Uhacae, Kinta ne’e.
Merita hatutan bee-moos difikulta tebetebes komunidade Aldeia Uhacae—kada loron obrigadu la’o bá mota hodi kuru bee-moos.
“Maski ha’u ema defisiente, ha’u-nia liman sorin aat, maibé ha’u tenke ba kuru bee tanba nesesidade mak obriga ami. Iha tinan kotuk, 2025, ajénsia Adventist Development and Relief Agency (ADRA) fura bee ba ami ne’ebé dada to’o iha ha’u-nia uma, maibé foin lalais ne’e bomba aat, entaun agora bee la sai, ne’ebé ami tenke hakat ba mota mak kuru bee,” nia haktuir.
Nune’e, nia husu Governu atu tau-matan ba komunidade Uhacae ne’ebé agora daudaun enfrenta difikuldade ba bee-moos.
Entretantu, Xefe Aldeia Uhacae, Mariano da Costa Soares, informa sira iha bee posu, maibé uza ba hariis no fase roupa de’it tanba meer ne’ebé labele konsume no ADRA mós instala bomba ida iha aldeia laran maibé aat ona.
“Kona-ba preokupasaun bee-moos ne’e uluk ha’u aprezenta iha suku hodi tau ba Programa Nasionál Dezenvolvimentu Suku (PNDS) nune’e iha tinan 2018 ke’e bee posu ida maibé meer. Tan ne’e, komunidade labele asesu bee-moos iha aldeia laran,” nia tenik.
Mariano informa populasaun Aldeia Uhacae lokaliza iha fatin rua—Uetali sentru uma-kain 27 no dook husi sentru hamutuk uma-kain 18, ho totál populasan na’in-200 resin.
Jornalista: Vitorino Lopes da Costa
Editór: Xisto Freitas da Piedade
