Komisaun D rekomenda formasaun espesializada ba traballadór timoroan iha área peska
DILI, 24 Setembru 2026 (TATOLI) – Komisaun D ba Asuntu Ekonomia no Dezenvolvimentu rekomenda ba Sekretária Estadu Formasaun Profisionál no Empregu (SEFOPE) atu fó formasaun espesializada iha área peska ba traballadór timoroan sira molok bá serbisu iha Koreia Súl.
Vise-Prezidente Komisaun D, Manuel Henrique Noronha, hatete foin lalais hala’o fiskalizasaun hodi haree direta kondisaun serbisu husi traballadór timoroan sira iha Koreia ne’ebé aprezenta preokupasaun sira.
Tanba traballadór sira, liliu iha área peska balun la hetan informasaun klara kona-ba natureza serbisu ne’ebé sira sei hala’o molok sai husi Timor-Leste, entaun difísil ba sira ne’ebé laiha esperiénsia nani tasi.
Ho situasaun ne’e bele aumenta risku ba seguransa no saúde traballadór sira hasoru bainhira situasaun emerjénsia.
“Ami rekomenda ba SEFOPE antes haruka traballadór tenke fasilita formasaun espesializada, liuliu iha área tasi nian atu sira bele iha koñesimentu no kapasidade”, nia hatete.
Relatóriu fiskalizasaun komisaun nian ne’e hetan ona apresiasaun no aprovasaun husi komisaun ho unanimidade, nune’e sei hato’o kópia ba entidade relevante atu tau atensaun.
Tuir nia, SEFOPE hala’o ona formasaun ba traballadór sira durante ne’e, maibé presiza formasaun espesífika iha peska atu mellora liután.
Tuir dadus, iha trimestre dahuluk 2026 traballadór timoroan iha rai-li’ur hatama remesa millaun $104,5 mai Timor-Leste, Reinu Unidu kontribui 40,5%, Koreia Súl 11%, Austrália 33% no nasaun seluk 15,5%.
Jornalista: Nelson de Sousa
Editora: Maria Auxiliadora
