Implementa desentralizasaun no poder lokál, Oekusi-oan presiza koopera malu no unidade
OEKUSI, 24 Setembru 2026 (TATOLI) – Autoridade Rejiaun Autonoma Espesiál Oekusi-Ambeno (RAEOA) liuhusi Sekretáriu Rejionál ba Asuntu Administrasaun no Finansa, no Autoridade seguransa liuhusi Polísia Nasionál Timor-Leste (PNTL), inklui akademista husu komunidade tomak koopera hamutuk hodi simu implementasaun poder lokál no desentralizasaun administrativa iha Oekusi.
Sekretáriu Rejionál ba Asuntu Administrasaun no Finansa, Salvador da Cruz hateten katak komunidade sira presiza iha kooperasaun no unidade.
“Nune’e, husi pontu importánsia ne’e, Governu sentrál mós sei entrega liuhusi desizaun,” Sekretáriu Rejionál, Salvador da Cruz hato’o nia mensajen iha Programa TATOLI Hakbesik iha Salaun Palaban, ohin.
Sekretáriu Rejionál ne’e husu mós Governu sentrál, preparasaun ba implementasaun poder lokál no desentralizasaun administrativa, karik bele fó ona kompeténsia atubele hanoin pozitivu ona, bele la’o daudaun ona, fazeadamente.
Nia énfaze, “Hahú husi parte intelektuál to’o komunidade nível baze, presiza ita halo kolaborasaun atu ita bele hala’o preparasaun. Maibé, Governu sentrál mós haree iha parte husi preparasaun husi unidade ne’e, ne’e bele entrega ona. Ita halo eleisaun hodi bele kria órgaun balun ne’e mak Governu lokál”.
Nune’e mós, Komandante Polísia Nasionál Timor Lorosa’e (PNTL) iha Oekusi, Superintendente Xefe Polísia Nicolau Francelino da Costa apela ba públiku, hahú husi Sakato to’o iha Sitrana, evita krime, evita halo perturbasaun kontra orden públiku, respeita ema nia dignidade, hadomi malu, labele hamosu problema, komete violénsia doméstika no asaltu malu.
Superintendente Xefe Polísia Nicolau espera Oekusi sai hanesan modelu ezemplar no konsidera ida-ne’e importante no presiza kuda iha ema idaidak nia hanoin liliu ba joven Oekusi-oan.
“Ba iha juventude, espesialmente ba iha komunidade ne’ebé mak iha suku 20 no aldeia 63, ne’ebé mak eziste iha Oekusi. Hamutuk ho PNTL, ita garante pás no estabilidade no unidade nasionál, hodi hasoru desentralizasaun poder lokál ne’e mak governu sei depozita iha Oekusi Ambeno,” nia apela.
Iha sorin seluk, Akademista Dili Institute of Technology (DIT) hato’o nia mensajen katak preparasaun no implementasaun desentralizasaun administrativa no poder lokál presiza maibé presiza abordajen ne’ebé iha gradualmente, neneik-neneik, tuir kapasidade.
“Ita presiza legalidade ne’ebé klaru. Ita presiza institusionalmente ne’ebé preparadu bazea ba kapasidade no partisipasaun komunidade. Ho nune’e, susesu la depende de’it ba transparénsia autoridade, maibé mós disponível iha rekursu umanu ne’ebé ita iha, finanseira ne’ebé ita iha no ita jere, infraestrutura ne’ebé ita iha, liuliu sistema kontabilidade ne’ebe tenke hadi’a, no la’o ba fatin, no kapasidade ne’ebé tenke presta servisu públiku nian,” nia mensajen.
Jornalista :Osória Marques
Editór: Rafael Ximenes de A. Belo
