SECOMS, ASEAN Foundation no FHT diskute implementasaun programa Scam Ready ASEAN iha Timor-Leste
DÍLI, 24 Setembru 2026 (TATOLI) – Sekretariu Estadu Komunikasaun Sosiál (SECOMS) hasoru reprezentante ASEAN Foundation no Fundasaun Hadomi Timor (FHT) hodi diskute kona-ba implementasaun programa Scam Ready ASEAN iha Timor-Leste.
Enkontru ne’e hala’o iha Gabinete Sekretáriu Estadu Komunikasaun Sosiál, Palásiu Governu, Dili, ho partisipasaun reprezentante ASEAN Foundation, lideradu husi jestór Projetu ba Programa Scam Ready ASEAN, Satria Ugahari, no reprezentante FHT.
Enkontru ne’e fó oportunidade ba parte hotu-hotu atu fahe informasaun no diskute planu implementasaun programa, liuliu kona-ba literasia dijitál, prevensaun fraude online no sensibilizasaun públika.
Satria Ugahari hateten katak programa ne’e sei implementa liuhusi Scam Ready Center, ne’ebé sei fó formasaun no hasa’e konsiénsia juventude Timor-Leste kona-ba risku fraude online no dalan atu prevene scam.
“Ita sei implementa programa Scam Ready Center atu hala’o kapasitasaun no hasa’e konsiénsia ba juventude sira ho idade 15 ba leten,” Satria Ugahari haktuir.
Tuir nia, implementasaun programa ne’e sei hahú iha fulan Outubru no sei remata iha fulan Dezembru 2026.
Programa ne’e sei hala’o liuhusi kolaborasaun ho FHT, ho objetivu atu hasa’e koñesimentu no konsiénsia juventude Timor-Leste kona-ba risku fraude online no mekanizmu prevensaun.
Esforsu ne’e mós sei kontribui ba kooperasaun entre instituisaun no organizasaun relevante sira hodi hametin prevensaun fraude online iha Timor-Leste.
Iha enkontru ne’e, ASEAN Foundation no FHT mós aprezenta ba SECOMS objetivu, planu no atividade sira ne’ebé sei implementa liuhusi programa Scam Ready ASEAN iha Timor-Leste.
Diskusaun mós foku ba prioridade programa nian iha área literasia dijitál, prevensaun scam no sensibilizasaun públika, inklui kontribuisaun SECOMS iha diseminasaun informasaun kona-ba seguransa online.
Sekretáriu Estadu Komunikasaun Sosiál, Expedito Dias Ximenes, hateten katak enkontru ne’e importante atu hasa’e koordenasaun no kolaborasaun entre SECOMS, ASEAN Foundation no FHT iha prevensaun fraude online no dezenvolvimentu literasia dijitál.
“Servisu hamutuk ida ne’e importante. Hanesan ASEAN Foundation no FHT bele suporta materiál no kapasitasaun, enkuantu SECOMS bele fasilita koordenasaun ho média no rádio relevante sira atu disemina informasaun kona-ba scam ba públiku,” nia hateten.
Nia hateten tan katak SECOMS bele propoin dezenvolvimentu pakote informasaun kona-ba seguransa dijitál, ne’ebé bele uza husi média, eskola, universidade, suku no organizasaun komunitária.
Pakote informasaun ne’e bele sai instrumentu ida atu ajuda públiku, liuliu juventude, komprende risku fraude online no hatene medida sira atu prevene no responde ba ameasa dijitál.
Jornalista: Camilio de Sousa
Editór: Filomeno Martins
