DNTT seidauk pinta zebra cross tanba sei planu alargamentu estrada
DILI, 25 Setembru 2026 (TATOLI)—Ministériu Transporte no Komunikasaun (MTK) liuhusi Dirasaun Nasaun Transporte Terrestre (DNTT) seidauk pinta zebra cross no sinál tránzitu sira tanba sei iha planu alargamentu estrada.
Diretór Dirasaun Nasionál Transporte Terrestre, Nelson Martins, hateten katak zebra cross ho markasaun sira ba dalan ne’e foindauk pinta ona husi kompañia Bandidu Qualidade, maibé tinta balun agora lamoos ka sai fali koor metan.
“Tanba ne’e, ami-nia tékniku hamutuk ho ADN halo hela verifikasaun ba zebra cross maibé tinta ne’e la’ós laiha kualidade. Tanba tanba ami ba observa iha terrenu tinta iha hela maibé tanba foer (metan), ne’e tanba ita-nia prosesu movimentasaun ne’e diariamente no ema lafase Estrada,” Diretór DNTT informa ba Agência Tatoli iha nia kna’ar fatin Balide, ohin.
Dirijente ne’e dehan, Timnor-Leste la hanesan ho nasaun seluk ne’e ema sempre fase estrada halo moos no tinta ne’e mós kór mutin, normalmente foer kona nia metan lalais de’it.
“Zebra cross balun kompañia la pinta tanba sira hein hela planu alargamentu Estrada. Aleinde iha prosesu alargamentu ne’e mós ho pakote ida inklui pinta zebra cross no markasaun ba dalan sira. Signkfika kompañia ne’ebé manán konkursu husi MOP ne’e mak sei implementa la’ós DNTT. Hanesan iha estrada BJ Habibie to’o Kuluhun ne’e,” nia subliña.
Kona-ba semáforu ne’ebé aat, nia dehan, tempu badak sei instala fali iha fatin identifikadu 11 ne’e, tanba daudaun ne’e iha hela prosesu 99% ona, hein de’it la kle’ur tan sei haree ona téknika kompañia nian halo servisu iha terenu.
“Ne’ebé servisu hotu sei implementa iha tinan ida-ne’e, tanba MTK prevee osan 2026 nian”, tenik nia.
Enuantu semáforu 11 ne’e ba instalasaun foun tolu hanesan tau iha Elemloi, Ai-mutin no Kuluhun de Baixu. Restu ne’e halo de’it instalasaun nafatin ba na fatin sira hanesan iha kruzamentu Balide, Vaganza, Vila Verde, Kolmera, Audian, Bidau (Tokobaru), Bidau Lesidere no iha Eletrisidade de Timor-Leste (EDTL) Kaikoli.
Jornalista : Alexandra da Costa
Editór : Cancio Ximenes
