Konstrusaun estrada sirtu iha Suku Uma-Ki’ik besik konklui ona
VIKEKE, 25 Setembru 2026 (TATOLI)—Xefe Suku Uma-Ki’ik, Postu Vikeke Vila, Munisípiu Vikeke, Claudino Amaral, informa konstrusaun estrada sirtu betaun liga ba Aldeia Aidák-Bein, Suku Uma-Ki’ik, agora daudaun obra besik konklui ona.
“Programa Nasionál Dezenvolvimentu Suku (PNDS) ba tinan 2026, ami Suku Uma-Ki’ik tau prioridade ba estrada sirtu betaun ne’ebé liga bá Aldeia Aidák-Bein atu ita-nia komunidade bele asesu. Nune’e, progresu ba obra referida besik konklui ona,” Claudino Amaral ba TATOLI iha Postu Vikeke Vila, Sesta ne’e.
Autoridade Komunitária Suku Uma-Ki’ik ne’e subliña daudaun ne’e badaen lokál husi Suku Uma-Ki’ik kontinua konstrui estrada sirtu bá Aldeia Aidak-Bein ho totál metru 300 ho nian luan metru haat (4).
“Kona-ba estrada sirtu ne’e agora ita-nia badaen sira kontinua servisu iha terrenu. Ha’u sempre ba haree servisu konstrusaun estrada atu fulan ida-ne’e ita bele finaliza obra,” nia hato’o.
Nia relata estrada sirtu ne’e badaen sira cor ona metru 200 no hela metru 100 bele ramata ona servisu konstrusaun estrada betaun ba Suku Uma-Ki’ik nian.
“Ha’u sente estrada betaun sei benefísia populasaun husi Aldeia Aidák-Bein, maibé fasilita mós ita-nia komunidade seluk iha Suku Uma-Ki’ik, tanba estrada ida-ne’e uluk laiha entaun difikulta tebes ba ita-nia komunidade. Tan ida-ne’e mak tinan ida-ne’e ami tau ba prioridade,” Claudino tenik.
Kona-ba obra PNDS 2026 ba Suku Uma-Ki’ik konstrusaun estrada sirtu betaun distánsia metru 300, ne’ebé aloka orsamentu ho totál $22.273,79, hahú konstrusaun iha fulan-Juñu no sei konklui iha fulan-Novembru 2026, sei benefísia aldeia Aidák-Bein ho totál uma-kain hamutuk 95 ho totál populasaun 410.
Jornalista: Vitorino Lopes da Costa
Editór: Xisto Freitas da Piedade
