MS promove nutrisaun no susu-been inan iha Kovalima
KOVALIMA, 25 Setembru 2026 (TATOLI)- Ministériu Saúde (MS) promove nutrisaun saudável no aleitamentu ho susu-been inan liuhusi atividade edukasaun no sensibilizasaun iha Suku Beco, Postu Administrativu Suai, Munisípiu Kovalima.
Atividade ne’e hala’o iha ámbitu komemorasaun Loron Nasionál Nutrisaun no Semana Mundial Susu Been Inan, ne’ebé envolve komunidade, inan-aman no labarik sira.
Diretora Jerál Saúde Kuidadu Primária, Elisabeth Leto Mau, hateten katak atividade ne’e importante atu hasa’e konsiensia família sira kona-ba nutrisaun no saúde labarik.
Nia hateten, tema Loron Nasionál Nutrisaun mak “Hamutuuk ba Nutrisaun, Família Forte, Futuru Forte”, enkuantu Semana Mundial Susu Been Inan ho tema “Susu Been Inan, Investimentu Di’ak ba Jerasaun Saudável”.
“Liuhusi atividade ida-ne’e ita hakarak fó koñesimentu ba komunidade kona-ba oinsá atu prepara ai-han nutritivu ba labarik sira no aproveita produtu lokál ne’ebé ita rasik kuda,” nia dehan.
MS mós hala’o screening ba labarik sira hodi sukat todan no altura, atu monitoriza sira-nia kresimentu no dezenvolvimentu.Aleinde ne’e, inan sira hetan demonstrasaun kona-ba preparasaun ai-han nutritivu ho uza produtu lokál. Atividade ne’e fó oportunidade ba komunidade atu aprende oinsá produtu ne’ebé hetan iha to’os bele transforma sai ai-han saudável ba família.
Elisabeth enkoraja inan-aman sira atu aumenta konsumu produtu lokál no hamenus dependénsia ba ai-han ne’ebé la fó benefísiu nutrisionál sufisiente. Kona-ba aleitamentu, nia fó hanoin ba inan sira kona-ba importánsia fó susu been inan ba bebe, tanba susu been inan iha nutriente importante ba kresimentu no dezenvolvimentu bebe.
Iha oportunidade ne’ebá, MS organiza mós kompetisaun kulinária entre grupu komunidade. Grupu Haburas hetan promeriu lugar ho pontu 87,5, enkuantu grupu Haforsa hetan segundu lugar ho pontu 78,2.
Premiu ba vencedór sira inklui sanan, tasu, kaneka, buli no sertifikadu apresiasaun husi Ministériu Saúde.
Reprezentante Prezidente Autoridade Munisípiu Kovalima, Hilário Oliveira, hato’o apresiasaun ba MS tanba kontinua realiza atividade saúde iha komunidade.
Nia hateten katak nutrisaun di’ak iha influénsia ba kresimentu labarik no presiza hetan atensaun husi família hotu.
“Liu husi nutrisaun di’ak ita bele hadi’a saúde no kresimentu labarik sira. Produtu lokál ne’ebé ita kuda rasik bele sai fonte ai-han nutritivu ba família,” nia dehan.
MS sei kontinua servisu hamutuk ho autoridade lokál no parseiru sira atu promove nutrisaun di’ak no aumenta konsiensia komunidade kona-ba saúde inan no labarik.
Notisia relevante:Susu been inan hasa’e imunidade labarik
Jornalista: Celestina Teles
Editór: Florencio Miranda Ximenes
