Obra Postu Saúde no Rezidénsia Pesoál Saúde iha Loi-Ulu iha faze konstrusaun
VIKEKE, 25 Setembru 2026 (TATOLI)—Xefe Suku Loi-Olu, Postu Administrativu Uatukarbau, Munisípiu Vikeke, Celestino de Fátima Monteiro, relata obra Planeamentu Dezenvovimentu Integradu Munisipál (PDIM) Vikeke ba konstrusaun postu saúde no rezidénsia pesoál saúde sira iha Suku Loi-Ulu daudaun ne’e iha ona faze konstrusaun.
“Kona-ba konstrusaun postu saúde no rezidénsia pesoál saúde liuhusi projetu PDIM ne’ebé konstrui iha ami-nia Suku Loi-Ulu, agora daudaun empreza responsável hahú faze konstrusaun ne’ebé la’o ona,” Celestino de Fátima Monteiro ba TATOLI iha Postu Uatukarbau, Sesta ne’e.
Autoridade Suku Loi-Ulu ne’e relata servisu fíziku ne’ebé badae sira halo daudaun mak hanesan ke’e fondasi ba postu saúde no fondasi ba rezidénsia nian no balun agora hada fondasi uma nian.
“Ita-nia badaen sira hada ona fondasi, moru protesaun, inklui sinta uma nian, ai-riin ba uma pesoál saúde nian hatuur ona, postu saúde nian mak ai-riin seidauk. Responsável empreza mós iha de’it fatin servisu hodi akompaña servisu sira,” nia haktuir.
Celestino hatutan, ba konstrusaun postu saúde, Autoridade Suku Loi-Ulu kontinua akompaña empreza implementadór sira nune’e servisu atuál la’o di’ak.
“Obra ne’e ha’u sempre akompaña. Servisu iha terrenu agora daudaun la’o hela. Ita-nia badaen sira kontinua servisu ba uma rua ne’ebé iha faze konstrusaun,” nia informa.
Celestino haklaken Postu Saúde Loi-Ulu konklui sei benefísia komunidade Suku Loi-Ulu tanba durante ne’e laiha postu saúde hodi halo atendimentu ba komunidade ne’ebé moras.
“Durante ne’e ami-nia postu saúde laiha. Uma ida-ne’ebé agora pesoál saúde sira uza ne’e uma Programa Nasionál Dezenvolvimentu Suku (PNDS) nian mak ita uza provizóriu ba atendimentu komunidade. Nune’e, postu saude ida-ne’e hotu sei benefísia tebes ba ita-nia komunidade asesu,” nia hato’o.
Obra postu saúde ho medida metru 16×15 no uma rezidénsia iha kuartu rua hodi fasilita pesoál saúde sira hela iha laran atende pasiente sira.
Obra ne’e orsamentu maihusi Autoridade Munisípiu Vikeke liuhusi diresaun PDIM, liuhusi konkursu públiku ho valór kontratu $481.845,73, responsabiliza husi Empreza Sambui Unip, Lda, hahú servisu iha fulan-Jullu 2026 no sei konklui iha fulan-Janeiru 2026.
Projetu postu saúde ne’e konklui sei benefísia populasaun Suku Loi-Ulu aldeia lima (5) kompostu husi Aldeia Builale populasuan na’in-251, uma-kain 56, Lia-Buta uma-kain 53 ho populasaun na’in-258, Assfada’e uma-kain 61, populasaun na’in-274, Deni Hare uma-kain 31, populasaun 176 no Aldeia Lau-Aba uma-kain 39, populasaun na’in-197, ho totál uma-kain hamutuk 240 no totál populasaun hamutuk 1.156.
Jornalista: Vitorino Lopes da Costa
Editór: Xisto Freitas da Piedade
