PNTL – Heineken realiza sensibilizasaun seguransa rodoviária ba estudante universitáriu
DÍLI, 25 Setembru 2026 (TATOLI) – Polísia Nasionál Timor-Leste (PNTL) hamutuk ho Heineken Timor realiza semináriu sensibilizasaun kona-ba seguransa rodoviária no konsumu responsável ba estudante universitáriu sira, iha Timor Lodge, Dili.
Diretur Superintendente Xefe Polísia ba Tráfiku no Rodoviária, João da Costa, hateten katak sensibilizasaun kona-ba seguransa rodoviária importante atu fó edukasaun, aumenta konsiénsia no muda atitude utilizadór estrada sira, hodi kria ambiente tráfiku ne’ebé seguru ba ema hotu.
Nia esplika katak prevensaun asidente tráfiku importante atu minimiza kanek grave no lakon vida ne’ebé bele akontese ba motorista no pasajeiru sira.
João da Costa mós subliña katak edukasaun kona-ba seguransa rodoviária ba labarik no joven sira hahú husi idade ki’ik importante atu sira komprende estrada sira atu hakat estrada ho seguru no respeita sinais tráfiku.
Nia hateten katak seguransa rodoviária presiza responsabilidade ema hotu nian.
“Motorista tenke respeita lei no regulamentu tráfiku, inklui uza kapasete no sintu seguransa, la uza telefone durante kondusaun no la konduz hafoin hemu tua,” nia haktuir.
Aleinde ne’e, semináriu ne’e fó oportunidade ba estudante universitáriu no públiku atu aumenta sira-nia komprensaun kona-ba sinais no regra tránzitu, inklui oinsá motorista sira bele adapta kondusaun bainhira hasoru situasaun estrada ne’ebé perigu, hanesan udan boot no estrada nakfera.
Iha sorin seluk, Country Director Heineken Timor, Woh Hock Khor, hateten katak alein sensibilizasaun kona-ba seguransa rodoviária, semináriu ne’e mós foku ba konsumu responsável.
“Ida ne’e oportunidade ba ita hotu atu sai embaixadór ba konsumu responsável,” nia dehan.
Nia salient katak estudante universitáriu sira mak lider, profisionál, emprezáriu no ema ne’ebé sei foti desizaun ba futuru Timor-Leste.
“Ba ita-nia estudante sira, imi mak lider futuru, profisionál, emprezáriu no ema ne’ebé sei foti desizaun iha Timor-Leste,” nia dehan.
Semináriu sensibilizasaun ne’e hetan partisipasaun husi estudante universitáriu na’in 50-resin husi Universidade Nasionál Timor Lorosa’e (UNTL), Universidade da Paz (UNPAZ), Universidade Díli (UNDIL) no Universidade Orientál (UNITAL).
Atividade ne’e ho objetivu atu hametin komprensaun komunidade nian kona-ba utilizasaun estrada ho responsabilidade hodi kontribui ba esforsu atu hamenus númeru asidente tráfiku iha Timor-Leste.
Jornalista: Camilio de Sousa
Editór: Filomeno Martins
