Governu kontinua halo diálogu pás no estabilidade ba komunidade iha Aldeia Au-hun

DILI, 26 Setembru 2026 (TATOLI)–Governu liuhusi Vise Primeiru-Ministru Koordenadór Asuntu Sosiál, Ministru Dezenvolvimentu Rurál no Abitasaun Komunitária, Mariano Assanami Sabino, kontinua halo diálogu ho komunidade iha Aldeia Au-hun, Suku Bekora, Munisípiu Dili atu integra pás no estabilidade iha ámbitu abertura ba jogu amizade nian.

Biban ne’e, Vise Primeiru-Ministru agradese ba komunidade nia prezensa hodi halo diálogu hamutuk kona-ba konstrusaun pás.

“Ita bele iha diferente hanoin maibé ita mesak timoroan de’it, entaun ita presiza tau hamutuk ideia ba konstrusaun pás iha ita-nia nasaun liuhusi ita-nia konstrusaun karakterístika,” Vise Primeiru-Ministru hato’o iha Aldeia Au-hun, Sábadu ne’e.

Notísia relevante : Assanami husu estudante iha Bobonaru promove pás no estabilidade

Governante ne’e dehan, fundamentu ida-ne’e importante tebes atu dezenvolve nasaun ba oin, tanba Timor-Leste nia eroízmu sira uluk mak fó an ba ukun rasik-an hodi sosa liberdade.

“Tanba ne’e, husu ba ita hotu atu labele estraga liberdade, tanba bainhira ita estraga maka ita sei halo traisaun ba erói sira, tanba sira-nia mate mak ohin ita moris, nune’e iha momentu ida-ne’e ita halo diálogu liuhusi jogu desportiva sira,” Assanami tenik.

Objetivu husi atividade ne’e mak atu fó kontinuidade ba joven sira atu espresa sira-nia hanoin hodi kontribui ba konstrusaun pás ba nasaun.

Iha biban hanesan, Segundu Komandante Polísia Nasionál Timor-Leste (PNTL) Munisípiu Dili, Superintendente Xefe Polísia, Luís da Silva, konsidera diólogu ne’e hanesan parte ida husi papel seguransa ba ema no atuasaun haree ba direitua umanus.

“Ko’alia kona-ba seguransa iha Aldeia Au-hun krime menus tebes, la’ós hanesan iha fatin seluk ne’ebé grupu ho grupu atake malu, disputa rai no seluk tan, maibé aldeia ne’e iha de’it pás no amizade,” Komandante louva.

Nia nota, dalabarak joven sira halo problema ne’e tanba kampu traballu menus, tanba ne’e sempre akontese problema balun iha bairru ida-nia laran.

“Tanba ne’e seguransa iha ita idaidak nia liman rasik, se ita lahalo kanek ema seluk nia fuan, entaun ema seluk mós sei la hanoin a’at mai ita, nune’e respeita no konsidera malu ne’e importante tebes atu kria pás no estabilidade ba sosiedade ida-nia laran,” nia tenik.

Nune’e mós, Administradór Postu Administrativu Kristu Rei, Fernando de Araújo husu ba komunidade tomak atu halo konstrusaun pás iha jogu desportivu, maski dalaruma haksesuk malu maibé mantein amigável.

“Estadu ida-ne’e hamriik sempre iha ninia kooperasaun hamutuk ho populasaun tomak, ne’ebé bele fortalese pás no estabilidade iha ita-nia rai Timor-Leste,” nia reforsa.

Jornalista     : Alexandra da Costa

Editora          : Julia Chatarina