ADB kompromete kontinua apoia prosesu dezenvolvimentu Timor-Leste
DÍLI, 28 Setembru 2026 (TATOLI) — Diretór Nasionál Banku Dezenvolvimentu Aziátiku (ADB), Artur Andrysiak, reafirma kompromisu instituisaun ne’e atu kontinua apoia Timor-Leste, liu-liu iha seitór infraestrutura, servisu báziku no dezenvolvimentu seitór privadu.
“Ohin loron, ha’u iha onra boot atu hasoru Primeiru-Ministru. Iha enkontru ne’e, ami ko’alia kona-ba apoiu husi Banku Dezenvolvimentu Aziátiku ba Timor-Leste,” Diretór ADB hateten ba jornalista sira iha Palásiu Governu, Dili, segunda ne’e.
Nia hateten ADB estabelese nia operasaun iha Timor-Leste iha 2002 no, dezde ne’ebá, kontinua fó apoiu ba dezenvolvimentu nasaun nian liuhusi empréstimu, doasaun no asisténsia téknika.
“Agora dadaun, área sira ne’ebé importante tebes ba ADB nia apoiu iha Timor-Leste mak dezenvolvimentu infraestrutura bázika, inklui konektividade estrada sira,” nia hateten.
Artur hateten enkontru ho Primeiru-Ministru Kay Rala Xanana Gusmão mós fó oportunidade ba ADB atu diskute kona-ba oinsá instituisaun ne’e bele aumenta tan nia apoiu ba Timor-Leste, no rona orientasaun Governu kona-ba área sira ne’ebé presiza atensaun.
“Área importante seluk ne’ebé ami ko’alia mak hanesan apoiu ADB ba Timor-Leste nia prosesu tama ba ASEAN. Ida-ne’e mak dahuluk, no agora ami nia apoiu foka ba prosesu integrasaun ba ASEAN,” nia afirma.
Nia esplika katak ADB servisu hamutuk ho instituisaun sira no ajénsia Governu oioin atu apoia prosesu integrasaun Timor-Leste ba ASEAN.
“Ami mos apoia infraestrutura importante sira balu molok Prezidensia ASEAN iha Timor-Leste iha tinan 2029,” nia dehan.
Apoiu ne’e, tuir nia, inklui kooperasaun ho parseiru dezenvolvimentu sira seluk atu dezenvolve aeroportu no buka dalan atu hametin tan infraestrutura transporte iha sidade Díli.
“Hanesan ne’e, ADB kontinua komprometidu atu servisu hamutuk ho Governu Timor-Leste no parseiru sira seluk atu apoia dezenvolvimentu sustentável no integrasaun Timor-Leste ba ASEAN,” nia reafirma.
Jornalista: Alexandra da Costa
Editór: Filomeno Martins
