Espoza eis primeiru-ministru Malázia mate ho tinan 100
DILI, 28 Setembru 2026 (TATOLI) – Espoza hosi eis-primeiru-ministru Malázia Mahathir Mohamad, Siti Hasmah, mate ho tinan atus ida, iha Ospitál Institutu Nasionál Fuan (IJN), Kuala Lumpur, Malázia, segunda ne’e.
Siti Hasmah Mohamad Ali, eis-primeiru ministru Malázia nia espoza, Mahathir Mohamad, mate iha ho tinan 100 no husik hela oan na’in-hitu.
Nia mate iha Institutu Nasionál Fuan nian besik tuku 9.20 dadeer. Ida-ne’e konfirma hosi nia oan-mane Mokhzani Mahathir bainhira konfirma hosi ajénsia notisioza estatál BERNAMA.
Siti nu’udar médiku ida ne’ebé uza nia plataforma hanesan eis-primeiru-ministru nia espoza hodi defende saúde inan nian, planeamentu familiár, alfabetizasaun, prevensaun abuzu droga nian no saúde mentál.
Nia selebra ona nia aniversáriu ba dala 100 iha loron 12 fulan-Jullu. Iha fulan tuirmai, nia hetan rekoñesimentu hosi ASEAN Records nu’udar Espoza Moris Tuan Liu hosi Eis-Primeiru-Ministru ida.
Mahathir, publika obituáriu ida iha mídia sosiál ho nia imajen ne’ebé akompaña ho orasaun ida: “Maromak perdua nia, hatudu mizerikórdia ba nia no fó dame ba nia.”
Postajen ne’e hetan “gosta” liu 114,000 no komentáriu 28,000 iha oras tolu nia laran iha Facebook, no “gosta” 164,000 no komentáriu besik 10,000 iha Instagram.
Fonte: BERNAMA/CNA
