ONU reafirma apoiu ba Timor-Leste iha Prosesu Eleisaun Prezidensiál, Parlamentár no Poder Lokál
DILI, 28 Setembru 2026 (TATOLI) — Ekipa United Nations Electoral Needs Assessment Mission (UN-NAM), akompaña husi Ministru Administrasaun Estatál, Tomás do Rosário Cabral, hasoru Primeiru-Ministru Kay Rala Xanana Gusmão atu diskute preparasaun no apoiu ba prosesu eleisaun prezidensiál, parlamentár no poder lokál iha Timor-Leste.
Ministru Administrasaun Estatál, Tomás do Rosário Cabral, hateten katak enkontru ne’e fó atensaun ba apoiu ONU ba Sekretariadu Tékniku Administrasaun Eleitorál (STAE), Komisaun Nasionál Eleisaun (KNE) no sosiedade sivíl, hodi kria kondisaun ne’ebé di’ak ba realizasaun eleisaun sira.
“Sira mós sei ajuda iha edukasaun sívika, rejistu biométriku, eleisaun iha rai-li’ur no prosedimentu tomak ne’ebé iha ligasaun ho prosesu eleisaun,” Ministru ne’e hato’o ba jornalista sira iha Palásiu Governu, ohin.
Nia dehan sira sei diskute tan iha loron Sesta kona-ba komprimisiu atu servisu hamutuk, liuliu ho observadór internasionál sira.
Nia esplika katak prezensa ONU importante atu apoia no observa prosesu demokrátiku iha Timor-Leste, inklui liuhusi observasaun iha Dili no munisípiu sira seluk.
Ministru ne’e mós hateten katak Governu sei halo atualizasaun ba resensiamentu eleitorál tanba sei sai baze importante ba planeamentu no organizasaun eleisaun sira.
Jornalista: Alexandra da Costa
Editór: Cancio Ximenes
