SEATOU husu komunidade evita konstrui uma foun iha Tasi-Tolu

DÍLI, 28 Setembru 2027 (TATOLI) — Sekretáriu Estadu Asuntu Toponímia no Organizasaun Urbana (SEATOU), Germano Santa Brites, husu komunidade atu labele kontinua konstrui uma foun iha área Tasi-Tolu, Díli.

Germano hateten katak área Tasi-Tolu tama iha rai Estadu nian no Governu iha planu atu uza rai ne’e ba projetu dezenvolvimentu nasionál ba interese públiku.

“Husu ba komunidade atu labele konstrui tan uma iha Tasi-Tolu, tanba rai ne’e pertense ba Estadu,” Germano hateten ba jornalista sira iha Colmera, Dili.

Nia esplika katak Governu, iha kooperasaun ho Federasaun Futeból Timor-Leste (FFTL), iha planu atu harii infraestrutura desportiva ho padraun internasionál iha área ne’e.

Infraestrutura ne’e sei inklui estádiu nasionál ho padraun internasionál, ne’ebé sei harii husi FFTL.

Tanba ne’e, Germano husu komunidade afetadu atu labele konstrui uma foun iha área referida, tanba Governu sei la fó indemnizasaun ba uma sira ne’ebé konstrui depois prosesu verifikasaun no levantamentu dadus propriedade.

Nia subliña katak medida ne’e importante atu evita komunidade husi prejuízu bainhira Governu implementa projetu dezenvolvimentu iha área Tasi-Tolu.

Governu, liuhosi entidade relevante sira, kontinua halo koordinasaun no verifikasaun ba komunidade afetadu husi prosesu eviksaun, ho objetivu atu garante katak jestaun rai Estadu nian no prosesu dezenvolvimentu hala’o tuir prosedimentu ne’ebé vigora.

Jornalista: Camilio de Sousa
Editór: Filomeno Martins