AIFAESA realiza reuniaun koordenasaun ho entidade iha Baukau
BAUKAU, 29 Setembru 2026 (TATOLI)—Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA, I.P.), Tersa ne’e, realiza reuniaun koordenasaun ho instituisaun relevante ligadu ho atividade inspesaun iha Baukau.
Koordenadór Serbisu AIFAESA Rejiaun Leste, David Soares, esplika atividade enkontru koodernasaun ne’e atu kumprimenta misaun hodi destaka funsionáriu iha parte rejiaun leste ho objetivu atu intensifika forte liután entre liña institusaun, líder suku no postu administrativu iha Baukau.
“Enkontru ne’e soe hanoin hamutuk ligadu ho atividade ekonómiku sira iha Baukau, akomodasaun ideia sira sei apoia ita atu fó asisténsia ba negosiante no komunidade,” David Soares informa iha Vila Nova, Baukau.
David Soares relata, husi rezultadu enkontru referidu sei kontinua trasa planu asaun ida liuliu ligadu ho serbisu AIFAESA nian iha baze hanesan halo koodernasaun entre liña institusaun sira hanesan SERVE, I.P., Serbisu Munisípal Edukasaun, Komérsiu no seluk tan.
Alende ne’e, iha rejiaun leste AIFAESA komesa halo intervensaun hafoin simu keixa rua hanesan iha Munisípiu Vikeke kona-ba produtu no Baukau iha restaurante iha-ne’ebé ekipa husu negosiante sira kumpri ijiene no saneamentu hodi garante saúde públika ba komunidade.
“Ita foin hahú ho koordenasaun mezmu limitasaun iha parte rekursu umanu no orsamentu maibé ami iha estratéjia inklui planu hodi halo serbisu nune’e bele kobre hotu atividade inspesaun iha sentru leste,” David Soares tenik.
AIFAESA husu komunidade liuliu negosiante sira bainhira seidauk entende serbisu inspesaun nian bele direta ba edifísiu hodi hatene informasaun nune’e futuru kumpri lei no regulamentu ligadu ho atividade negósiu.
Entretantu, AIFAESA, I.P., rejiaun leste destaka funsionáriu hamutuk na’in-sia kompostu tékniku no inspetór na’in-lima, asistente na’in-tolu no motorista na’in-ida.
Jornalista: Natalino Belo
Editór: Xisto Freitas da Piedade
